திமுக சார்பில் ஒரு கோடி ரூபாய் நிதி!

தி.மு.க. செயல்தலைவர் மு.க.ஸ்டாலின் ஹார்வார்டு பல்கலை கழகத்தில் தமிழ் இருக்கை அமைவதற்காக தி.மு.க. சார்பில் 1 கோடி ரூபாய் நிதி வழங்கப்படும் என  தெரிவித்துள்ளார்.

அவர் வெளியிட்டுள்ள அறிக்கையில், உலகப் புகழ்பெற்ற ஹார்வார்டு பல்கலை கழகத்தில் தமிழுக்கு இருக்கை அமைவது தமிழகத்தில் வாழ்பவர்களுக்கு மட்டுமின்றி உலக நாடுகளில் வசிக்கும் தமிழ்ப்பெருமக்கள் அனைவருக்கும் தேனான செய்தி என்று குறிப்பிட்டுள்ளார்.

தமிழ் மொழி வளர்ச்சி மற்றும் ஆராய்ச்சிப் பணியில் திராவிட முன்னேற்றக்கழகத்தின் மற்றுமொரு பங்களிப்பாக, ஹார்வார்டு தமிழ் இருக்கை அமைவதற்கு 1 கோடி ரூபாய் வழங்குவது என முடிவெடுக்கப்பட்டுள்ளதாக கூறியுள்ளார். தி.மு.க. தலைவர் கருணாநிதியின் சார்பில் இந்த நிதியை வழங்குவதாக குறிப்பிட்டுள்ள ஸ்டாலின், ஹார்வர்டு பல்கலை கழகத்தில் தமிழ் இருக்கை விரைவில் அமைந்து, தேமதுரத் தமிழோசை உலகமெல்லாம் பரவ வகை செய்ய வாழ்த்துவதாக குறிப்பிட்டுள்ளார்.

மேலும் செய்திகளுக்கு தினச்சுவடுடன் இணைந்திருங்கள்.