டி.எம்.கே. ஃபைல்ஸ் 2 வீடியோ.. வெளியிட்டார் அண்ணாமலை..!!

[Image Source : Twitter/@annamalai_k]

DMK Files 2 தொடர்பான வீடியோவை வெளியிட்டார் தமிழ்நாடு பாஜக தலைவர் அண்ணாமலை.

தமிழக பாஜக தலைவர் அண்ணாமலை, தமிழக ஆளுநர் ஆர்.என்.ரவியை இன்று சந்தித்து, திமுக மீது ஊழல் குற்றச்சாட்டுகளை முன்வைத்து அதற்கான ஆவணங்களை DMK files 2 என்ற பெயரில் தமிழ்நாடு ஆளுநர் ஆர்என் ரவியிடம் பாஜக தலைவர் அண்ணாமலை ஒப்படைத்தார்.

ஏற்கனவே, டிஎம்கே பைல்ஸ் 1 என்ற திமுக அமைச்சர்களின் சொத்து பட்டியலை தயாரித்து வீடியோவாக வெளியிட்டு இருந்த நிலையில், தற்போது டிஎம்கே பைல்ஸ் 2 என்ற ஊழல் பட்டியலையும் ஆளுநரிடம் அளித்துள்ளதாக கூறப்பட்டது.

ஆளுநரை சந்தித்தபின் பாஜக மாநில தலைவர் அண்ணாமலை தனது ட்விட்டர் பக்கத்தில் பதிவு ஒன்றை பதிவிட்டிருந்தார். அதில், இன்று தமிழக பாஜக மூத்த தலைவர்களுடன், தமிழக ஆளுநர் ஆர்என் ரவி அவர்களைச் சந்தித்தோம்.

அப்போது, ஆளுநர் அவர்களிடம், திமுக அமைச்சர்கள், சட்டமன்ற உறுப்பினர்கள், பாராளுமன்ற உறுப்பினர்கள் மற்றும் திமுக முதல் குடும்பத்துடன் தொடர்புள்ள பினாமி தகவல்கள் அடங்கிய, திமுக ஃபைல்ஸ் பகுதி 2 ஆவணங்களையும், மேலும், ரூ.5600 கோடி மதிப்பிலான 3 ஊழல் குறித்த ஆதாரங்களையும் வழங்கி, இது தொடர்பாக அவர் தலையிட்டு தகுந்த நடவடிக்கை எடுக்க வேண்டுமென்று கோரிக்கை விடுத்துள்ளோம் என தெரிவித்துள்ளார். இதையடுத்து, DMK Files 2 தொடர்பான வீடியோவை வெளியிட்டார் தமிழ்நாடு பாஜக தலைவர் அண்ணாமலை.