சென்னை-சேலம் 8 வழிச்சாலை திட்டம் …!நிலம் கையகப்படுத்த சென்னை உயர்நீதிமன்றம் அதிரடி தடை …!

சேலம்-சென்னை 8 வழிச்சாலைக்கு நிலம் கையகப்படுத்த சென்னை உயர்நீதிமன்றம் தடை பிறப்பித்ததுள்ளது.

இது தொடர்பாக கடந்த செப்டம்பர் 11 ஆம் தேதி  வழக்கை விசாரித்த சென்னை உயர்நீதிமன்றம்  109 மரங்களை வெட்டியதற்கும்  கடும் கண்டனம் தெரிவித்தது.மேலும்  சென்னை – சேலம் 8 வழிச்சாலை திட்டத்துக்கு ஏன் தடை விதிக்க கூடாது ? தனியார் நிலத்தை உட்பிரிவு செய்து அரசு அளித்த அறிக்கையை சுட்டிக்காட்டி உயர்நீதிமன்ற நீதிபதிகள் சரமாரியாக கேள்வி எழுப்பினார்கள்.

அதேபோல் சென்னை-சேலம் 8 வழிச்சாலை திட்டத்துக்காக மரங்களை வெட்டக்கூடாது என்ற உத்தரவை மீறினால் 8 வழிச்சாலை திட்டத்துக்கு தடை விதிக்க நேரிடும் என்றும் சென்னை உயர்நீதிமன்ற நீதிபதிகள் தெரிவித்தனர்.

இதன் பின்னர்  சுற்றுச்சூழல் ஆய்வு அறிக்கையை வெள்ளிக்கிழமை(இன்று ) தாக்கல் செய்வதாக உயர்நீதிமன்றத்தில் மத்திய அரசு தகவல் தெரிவித்தது.

இதேபோல்  இன்று மத்திய அரசு இது தொடர்பாக உயர்நீதிமன்றத்தில் தனது தரப்பு பதிலை தாக்கல் செய்தது.அதில் சேலம்-சென்னை 8 வழிச்சாலைக்கு நிலம் கையகப்படுத்தும் பணி 2 வாரத்திற்கு தற்காலிகமாக நிறுத்தி வைக்கப்பட்டுள்ளது.மேலும் 8 வழிச்சாலை திட்டத்தை மாற்றியமைக்க திட்டமிட்டுள்ளதாகவும் அறிக்கை தாக்கல் செய்துள்ளது .அதேபோல் திட்டத்தை இறுதி செய்யும்வரை நிலம் கையகப்படுத்தும் நடவடிக்கை மேற்கொள்ளப்படாது என்று  மத்திய அரசு தெரிவித்தது.

இந்நிலையில் சேலம்-சென்னை 8 வழிச்சாலைக்கு நிலம் கையகப்படுத்த சென்னை உயர்நீதிமன்றம் தடை பிறப்பித்துள்ளது.மறு உத்தரவு வரும் வரை தற்காலிக தடை தொடரும் என்று உயர்நீதிமன்றம் அறிவித்துள்ளது.இன்று மத்திய அரசு தாக்கல் செய்த சுற்றுச்சூழல் ஆய்வு அறிக்கையில் முரண்பாடுகள் இருந்ததை அடுத்து சேலம்-சென்னை 8 வழிச்சாலைக்கு நிலம் கையகப்படுத்த சென்னை உயர்நீதிமன்றம் தடை பிறப்பித்தது.