விஐபிகளுக்கு 10அடிக்கு ஒரு பாதுகாவலர்.! மகளிர் கல்லூரிக்கு பாதுகாப்பு இல்லை.! – உயர்நீதிமன்றம் காட்டம்.!

விஐபிகளுக்கு 10 அடிக்கு ஒரு பாதுகாவலர் செல்கிறார். ஆனால், மாணவிகளுக்கு பாதுகாப்பாக காவலர்களை நிறுத்தலாமே என உயர்நீதிமன்றம் கருத்து தெரிவித்துள்ளது. 

கடந்த சில நாட்களுக்கு முன்பு மதுரை மகளிர் கல்லூரியில் மாணவியின் தந்தையை சிலர் தாக்கிய சம்பவம் பரபரப்பை ஏற்படுத்தியது. இதனை தொடர்ந்து தாக்குதல் நடத்தியவர்கள் கைது செய்யப்பட்டனர்.

இது தொடர்பாக மதுரை உயர்நீதிமன்றத்தில் விட்ட்டோரியா என்பவர் வழக்கு தொடர்ந்து இருந்தார். அதில் தமிழகத்தில் உள்ள அனைத்து மகளிர் கல்லூரியிலும் பாதுகாப்பு பணிக்காக காவலர்களை தமிழக அரசு நியமிக்க வேண்டும். என கூறப்பட்டு இருந்தது.

இதனை விசாரித்த நீதிபதிகள், ‘ மகளிர் கல்லூரிகளில் மாணவிகளின் பாதுகாப்புக்கு அரசு என்னென்ன நடவடிக்கை எடுத்துள்ளது என கேள்வி எழுப்பினர். விஐபிகளுக்கு 10 அடிக்கு ஒரு பாதுகாவலர் செல்கிறார். ஆனால், மாணவிகளுக்கு பாதுகாப்பாக காவலர்களை நிறுத்தலாமே என கருத்து தெரிவித்தனர்.

இதில் அரசு தரப்பில், மதுரையில் வெவ்வேறு நாட்களில் மகளிர் கல்லூரி முன்பு நடந்த சம்பவங்களில் சம்பந்தப்பட்டவர்கள் மீது வழக்குப்பதிவு செய்யப்பட்டு அவர்கள் கைது செய்யப்பட்டுள்ளனர். சம்பந்தப்பட்ட கல்லூரிகளில் பாதுகாப்பு பணிக்காக காவலர்கள் நியமிக்கப்பட்டுள்ளனர் என விளக்கம் அளிக்கப்பட்டது.

பின்னர் மதுரை உயர்நீதிமன்ற நீதிபதிகள், ‘ மகளிர் கல்லூரிகளின் பாதுகாப்பு நடவடிக்கை குறித்து மாநில உள்துறை செயலாளர், தமிழக காவல்துறை தலைவர் பதிலளிக்க உத்தரவு பிறப்பித்து வழக்கை நீதிமன்றம் ஒத்திவைத்துள்ளது.