#BREAKING: ரூ.25 கோடியில் ஒலிம்பிக் தங்கம் தேடுதல் திட்டம் – முதலமைச்சர் அறிவிப்பு

தமிழக விளையாட்டு வீரர்கள் ஒலிம்பிக் போட்டிகளில் பதக்கம் வெல்ல தமிழக அரசு முயற்சியை முன்னெடுத்துள்ளது என முதலமைச்சர் தகவல்.

தமிழ்நாடு சட்டப்பேரவையில் மாற்றுத்திறனாளிகள், சமூக நலன் மற்றும் மகளிர் உரிமைத்துறை மானிய கோரிக்கை மீதான விவாதம் இன்று நடைப்பெறுகிறது. அப்போது பேசிய முதலமைச்சர் மு.க.ஸ்டாலின், தமிழகத்தின் 4 மண்டலங்களிலும் தலா ஒன்று என 4 ஒலிம்பிக் அகாடமி அமைக்கப்படும் என விதி எண் 110ன் கீழ் பல்வேறு முக்கிய அறிவிப்புகளை வெளியிட்டார். தமிழக விளையாட்டு வீரர்கள் ஒலிம்பிக் போட்டிகளில் பதக்கம் வெல்ல தமிழக அரசு முயற்சியை முன்னெடுத்துள்ளது என்றும் ரூ.25 கோடியில் ஒலிம்பிக் தங்கம் தேடுதல் திட்டம் செயல்படுத்தப்படும் எனவும் தெரிவித்தார்.

சட்டப்பேரவையில் விதி எண் 110ன் கீழ் உரையற்றிய முதலமைச்சர் மு.க.ஸ்டாலின், பாரம்பரிய விளையாட்டான சிலம்பம் விளையாட்டை ஊக்கப்படுத்த தமிழக அரசு திட்டமிட்டுள்ளது. சிலம்ப வீரர்களுக்கு விளையாட்டு துறைக்கான இட ஒதுக்கீட்டில் 3% வழங்கப்பட்டுள்ளது எனத் தெரிவித்தார். அனைத்து சட்டப்பேரவை தொகுதிகளிலும் தலா ரூ.3 செலவில் சிறு விளையாட்டு அரங்கங்கள் அமைக்கப்படும். சென்னைக்கு அருகே பிரமாண்ட விளையாட்டு நகரம் அமைக்கப்படும். ஏடிபி சென்னை ஓபன் டென்னிஸ் தொடர், பீச் வாலிபால் போட்டிகளை மீண்டும் நடத்த அரசு திட்டமிட்டுள்ளது என்றும் கூறினார்.

மேலும், வடசென்னையில் ரூ.10 கோடி செலவில் நவீன குத்துசண்டை மையம் அமைக்கப்படும் என்றும் மதுரை அலங்காநல்லூரில் ஜல்லிக்கட்டு மைதானம் அமைக்கப்படும் எனவும் விதி ஏன் 110ன் கீழ் முதலமைச்சர் அறிவித்துள்ளார். விளையாட்டு துறையில் தமிழகம் முன்னணி மாநிலமாக திகழ தமிழக அரசு முழு முயற்சிகளை மேற்கொண்டுள்ளது என்றும் தெரிவித்தார்.