#BREAKING : தமிழகத்தில் ஸ்டெர்லைட் ஆலையை அனுமதிக்க முடியாது – உச்சநீதிமன்றத்தில் தமிழக அரசு மனு

Tamilnadu government[File iamge]

கடந்த சில வருடங்களுக்கு முன் தூத்துக்குடியில் இயங்கி வந்த ஸ்டெர்லைட் ஆலையை மூட கோரி, தூத்துக்குடி மக்கள் போராட்டத்தில் ஈடுபட்டனர். இந்த போராட்டத்தில் 13பேர் காவல்துரையினரால் சுட்டு கொல்லப்பட்டனர். இந்த சம்பவம் தமிழகத்தை உலுக்கிய நிலையில், ஸ்டெர்லைட் ஆலையை தமிழ்நாட்டு மாசுக்கட்டுப்பாட்டு வாரியம் இந்த நிறுவனத்தை மூடி நடவடிக்கை எடுத்த  நிலையில், இதற்கான அரசாணையை  தமிழக அரசு  பிறப்பித்திருந்தது.

இந்த ஆணையை சென்னை உயர்நீதிமன்றம் உறுதி செய்தது. வேதாந்த நிறுவனம் இந்த அரசாணையை எதிர்த்து உச்சநீதிமன்றத்தில் மேல்முறையீடு செய்யப்பட்டது. இதில் இடைக்கால நிவாரணங்கள் எதுவும் இதுவரை ஸ்டெர்லைட் நிறுவனத்திற்கு வழங்கப்படாத நிலையில், இந்த மனுவில் அனைத்து தரப்பினரும் எழுத்துப்பூர்வ பதில் அளிக்குமாறு உச்சநீதிமன்றம் ஏற்கனவே உத்தரவு பிறப்பித்திருந்தது.

இந்த நிலையில், ஸ்டெர்லைட் ஆலையை தமிழகத்தில் அனுமதிக்க முடியாது என்று 25 பக்கங்கள் கொண்ட விரிவான அறிக்கையை தமிழ்நாடு மாசு கட்டுப்பாட்டு வாரியம் உச்ச நீதிமன்றத்தில் தாக்கல் செய்துள்ளது. அந்த அறிக்கையில், வேதாந்த நிறுவனத்தின் மேல்முறையீட்டு மனுவை அபராதத்துடன் தள்ளுபடி செய்ய வேண்டும். சுற்றுச்சூழல் பாதுகாப்பு தொடர்பானது என்பதால் ஸ்டெர்லைட் ஆலையை அனுமதிக்க முடியாது என்றும் தெரிவிக்கப்பட்டுள்ளது.

வேதாந்த நிறுவனம் கடந்த 22 ஆண்டுகளாக சுற்றுச்சூழல் மாசை ஏற்படுத்தி உள்ளது. அடிப்படையான விதிமுறைகளை கூட வேதாந்தா நிறுவனம் பின்பற்றவில்லை என குற்றம்சாட்டியுள்ளது. இந்த நிலையில், இந்த வழக்கு நாளை உச்சநீதிமன்றத்தில் தலைமை நீதிபதி அமர்வு முன் விசாரணைக்கு வரும் என எதிர்பார்க்கப்படுகிறது.