தலைவர் அண்ணாமலை அறிவுறுத்தலின் பேரில் பந்த் தற்காலிகமாக ஒத்திவைப்பு.! பாஜக அறிவிப்பு.!

கோவையில் அக்டோபர் 31ஆம் தேதி நடைபெற இருந்த பந்த் ஒத்திவைக்கப்படுவதாக பாஜக அறிவித்துள்ளது. 

கோவை கார் வெடிப்பு சம்பவத்தை தொடர்ந்து, திமுக அரசின் நடவடிக்கைகளை கண்டித்து பாஜக சார்பில் அக்டோபர் 31ஆம் தேதி பந்த் நடைபெறும் என அறிவிக்கப்பட்டது.

இந்த பந்திற்கு தடை கேட்டு சென்னை உயர்நீதிமன்றத்தில் வழக்கு தொடரப்பட்டு இருந்தது. இதில் பதிலளித்த பாஜக மாநில தலைவர் அண்ணாமலை தரப்பு பாஜக பந்திற்கு யாருக்கும் அழைப்பு விடுக்கவில்லை. அந்த பாஜக செயற்குழு உறுப்பினர் அறிவித்த பந்திற்கு பாஜக மாநில கமிட்டி அனுமதி அளிக்கவில்லை என கூறினார்.

இதனை அடுத்து, பந்தில் ஏதேனும் அசம்பாவிதங்கள் நேர்ந்தாலோ, அல்லது அதற்கான முகாந்திரம் இருந்தாலோ காவல்துறையினர் நடவடிக்கை எடுக்கலாம் என உத்தரவு பிறப்பித்து வழக்கை தள்ளிவைத்தது.

இதனை அடுத்து பாஜக சார்பில் நாளை மறுநாள் (அக்டோபர் 31இல்) நடத்தப்பட இருந்த பந்த் ஒத்திவைக்கப்படுவதாக தெரிவிக்கப்பட்டுள்ளது. வணிகர்கள், தொழிலதிபர்கள், தொழில் முனைவோர் இந்த பந்த் போராட்டம் காரணமாக பாதிக்கப்படுவதாலும், மக்களுக்கு இடையூறு ஏற்பட கூடாது என மாநில தலைவரிடம் கேட்டுக்கொண்டதன் பேரில், பாஜக மாநில தலைவர் அண்ணாமலை அறிவுறுத்தலின் பேரில் இந்த முடிவு எடுக்கப்பட்டுள்ளதாக குறிப்பிடப்பட்டுளது.