திமுக எம்பி ஆ.ராசாவுக்கு எதிராக பாஜகவினர் போராட்டம்.! 50 பேர் கைது.!

கோவை விமான நிலையம் அருகே திமுக எம்.பி ஆ.ராசாவுக்கு எதிராக கருப்பு கொடி ஏந்தி பாஜக மகளிரணியினர் போராட்டத்தில் ஈடுப்பட்டனர்.   

திமுக எம்.பி ஆ.ராசா சில வாரங்களுக்கு முன்னர் மனுஸ்மிருதி பற்றி தனது கருத்துக்களை ஒரு விழாவில் பேசியிருந்தார். இந்த கருத்துக்கு பாஜகவினர் மற்றும் இந்து அமைப்பினரிடம் இருந்து எதிர்ப்புகள் கிளம்பின.

திமுக எம்பி ஆ.ராசாவுக்கு எதிராக சில ஆர்ப்பாட்டங்களும் நடைபெற்றன. இந்நிலையில் நீலகிரி எம்பி ஆ.ராசா, இன்று கோவை விமான நிலையத்திற்கு வந்திறங்கினார்.

ஆ.ராசாவை கண்டித்து கோவை விமானநிலையத்தில் இருந்து காலப்பட்டி செல்லும் சாலையில் பாஜக மகளிர் அணியினர் கருப்புகொடி ஏந்தி போராட்டத்தில் ஈடுபட்டனர்.

இந்த போராட்டத்தில் ஈடுபட்ட 50க்கும் மேற்பட்டோரை போலீசார் கைது செய்தனர். அவர்கள் ஏதேனும் மண்டபத்தில் தங்க வைக்கப்பட்டு பின்னர் விடுவிக்கப்படுவர் என கூறப்படுகிறது.