தமிழகத்தில் இருமொழிக் கொள்கை தான் தொடரும் -முதல்வர் பழனிச்சாமி உறுதி

தமிழகத்தில் இருமொழிக் கொள்கை தான் தொடரும் என்று முதல்வர் பழனிச்சாமி  தெரிவித்துள்ளார்.

அண்மையில் புதிய கல்வி கொள்கைக்கு மத்திய அமைச்சரவை ஒப்புதல் அளித்தது.புதிய கல்விக்கொள்கையில் மும்மொழிக் கொள்கையில் சமஸ்கிருதத்தை விருப்ப பாடமாக அறிமுகம் செய்யப்படும்.எந்த மொழியையும் மாணவர்கள் மீது திணிக்க போவது இல்லை, அயல்நாட்டு மொழிகளையும் மாணவர்கள் படிக்க தேர்வு செய்யலாம். மூன்றாவது மொழி என்ன என்பதை அந்தந்த மாநில அரசுகள் முடிவு எடுக்கலாம்.5 -ஆம் வகுப்பு வரை தாய்மொழிக்கல்வியில் கற்பிக்கும் முறை இருக்க வேண்டும் என்று தெரிவிக்கப்பட்டது.

இதன் பின்னர் முதலமைச்சர் பழனிசாமி வெளியிட்ட அறிவிப்பில்,மத்திய அரசால் வெளியிடப்பட்டுள்ள புதிய கல்விக்கொள்கையில், மும்மொழி கொள்கை இடம் பெற்று இருந்தாலும், மாண்புமிகு அம்மாவின் அரசு மும்மொழிக் கொள்கையினை தமிழ்நாட்டில் எப்போதும் அனுமதிக்காது என்றும், இரு மொழி கல்வி கொள்கையை மட்டுமே தொடர்ந்து பின்பற்றும் என்று தெரிவித்தார்.

இந்நிலையில் இன்று திண்டுக்கல்லில் செய்தியாளர்களுக்கு முதலமைச்சர் பழனிசாமி பேட்டியளித்தார் .அப்பொழுது அவர் கூறுகையில்,பேரறிஞர் அண்ணா, எம்.ஜி.ஆர் மற்றும் ஜெயலலிதா கண்ட கனவு இருமொழி கொள்கை தான். தமிழகத்தில் இருமொழிக் கொள்கை தான் தொடரும் என்று தெரிவித்துள்ளார்.