பாஜகவுடன் கூட்டணி வைத்ததுதான் அதிமுகவின் பின்னடைவுக்கு காரணம் – கே.எஸ்.அழகிரி..!

அதிமுகவின் சறுக்கல்களுக்கு பாஜக உடன் அவர்கள் காட்டும் நெருக்கமே காரணம் என தமிழ்நாடு காங்கிரஸ் தலைவர் கே.எஸ்.அழகிரி தெரிவித்துள்ளார்.

திருச்சியில் செய்தியாளர்களை சந்தித்த தமிழ்நாடு காங்கிரஸ் தலைவர் கே.எஸ்.அழகிரி, பாஜகவுடன் கூட்டணி வைத்ததுதான் அதிமுகவின் பின்னடைவுக்கு காரணம். அதிமுக நடத்திய போராட்டத்தில் அரசியல் இருக்கிறதே தவிர வேறொன்றும் இல்லை எனவும் தெரிவித்துள்ளார்.

அதிமுகவின் சறுக்கல்களுக்கு பாஜக உடன் அவர்கள் காட்டும் நெருக்கமே காரணம். பாஜகவை எதிர்த்து அதிமுக போராட வேண்டும். ரூ.35க்கு விற்க வேண்டிய பெட்ரோலை ரூ.100க்கு விற்கிறார்கள். இதற்கு காரணம் மத்திய அரசு, ஆனால், அதிமுக அவர்களை எதிர்த்துப் போராடாமல், சிறப்பாக செயல்பட்டு வரும் திமுகவை எதிர்த்து போராடுகிறது என தெரிவித்தார்.

மேலும், இந்து சமய அறநிலையத்துறை அனைத்து சமூக மக்களையும் கோவிலுக்குள் அனுமதித்து சனாதனத்தை ஒழித்து சமதர்மத்தை காத்தது . இந்து சமய அறநிலையத்துறையை கலைக்க வேண்டும் என்றும் பாஜக கூறுவது கண்டிக்கத்தக்கது என கூறினார்.