அதிமுக பொதுக்குழு வழக்கு! அவைத்தலைவர் பதவி என்பது என்ன? நீதிபதிகள் கேள்வி.!

அதிமுக பொதுக்குழு தொடர்பான வழக்கு விசாரணையில் ஒபிஎஸ் தரப்பு  வாதங்கள் முன்வைக்கப்பட்டு வருகிறது.

கடந்த வருடம் ஜூலை மாதம் எடப்பாடி பழனிசாமி தலைமையில் நடைபெற்ற அதிமுக பொதுக்குழுவுக்கு எதிராக ஓபிஎஸ் தரப்பு உச்சநீதிமன்றத்தில் வழக்கு தொடர்ந்து இருந்தது. இந்த வழக்கு விசாரணை ஒத்திவைக்கப்பட்ட நிலையில் இன்று, இரண்டாவது நாளாக தொடர்ந்து நடைபெற்று வருகிறது.

இதில் முதலில் தற்போது ஓபிஎஸ் தரப்பு வாதங்கள் முன்வைக்கப்பட்டு வருகின்றன. அதிமுகவின் சட்ட விதிகளுக்கு முரணாக, குழப்பம் ஏற்படுத்துவதை இபிஎஸ் தரப்பில் செயல்படுவதாகவும், புதிய விதிமுறைகளை பின்பற்றுவதாகவும் ஓபிஎஸ் தரப்பு வாதம் முன்வைக்கப்பட்டது.

மேலும் புதியதாக தேர்ந்தெடுக்கப்பட்ட அவைத்தலைவர் முறை என்பது தவறானமுறை என்று ஓபிஎஸ் தரப்பில் வாதம் வைக்கப்பட்டது. மற்றும் அவைத்தலைவர் பொறுப்புகள் பற்றி நீதிபதிகள் கேட்டபோது, பொதுக்குழு மற்றும் செயற்குழு கூட்டம் கூட்டுவது பற்றி முடிவு எடுக்கும் அதிகாரம் கொண்டவர் என ஓபிஎஸ் தரப்பில் பதில் அளிக்கப்பட்டது.

பொதுக்குழு, செயற்குழு கூடுவதற்கு மொத்த உறுப்பினர்களில் 5இல் ஒரு பங்கினர் குழு கூடுவதற்கு கோரிக்கை வைக்கும்போது ஒருங்கிணைப்பாளர் மற்றும் இணை ஒருங்கிணைப்பாளர்கள் சேர்ந்து கூறும்பட்சத்தில் பொதுக்குழு மற்றும் செயற்குழு கூட்டம் கூடும் எனும் கட்சி விதியை மேற்கோள் காட்டி கூறப்பட்டது.

பொதுச்செயலாளர் பதவி என்பது ஜெயலலிதாவிற்கு மட்டுமே உரியது, இனி அந்த பதவிக்கு தேர்தல் நடத்தக்கூடாது என முடிவு செய்யப்பட்டபிறகு தற்போது மீண்டும் அதைக் கொண்டுவர முயற்சிப்பது கட்சியின் அடிப்படை சட்ட விதிகளுக்கு முற்றும் எதிரானது என்றும் நீதிமன்றம் இந்த முடிவுகளை ரத்து செய்யவேண்டும் என்றும் ஓபிஎஸ் தரப்பில் வாதம் முன்வைக்கப்பட்டு வருகிறது.