குற்றாலத்தில் வெள்ளம்…அடித்து செல்லப்பட்ட சிறுவன் சடலமாக மீட்பு!!

Coutrallam [file image]

சென்னை : குற்றாலம் பழைய அருவியில் வெள்ளத்தால் அடித்துச்செல்லப்பட்ட சிறுவன் சடலமாக மீட்பு

தென்காசி பழைய குற்றால அருவியில் குளித்துக் கொண்டிருந்தபோது ஏற்பட்ட திடீர் வெள்ளப்பெருக்கில் சிக்கி அடித்துச் செல்லப்பட்ட நெல்லையைச் சேர்ந்த சிறுவன் (17) அஸ்வின் சடலமாக மீட்கப்பட்ட சம்பவம் பெரும் சோகத்தை ஏற்படுத்தியுள்ளது. ஏற்கனவே, தமிழகத்தின் பல மாவட்டங்களில் கனமழை பெய்து கொண்டு இருக்கும் நிலையில், மேற்கு தொடர்ச்சி மலைகளில் பெய்த கனமழை காரணமாக தென்காசி  பழைய குற்றால அருவியில் வெள்ளப்பெருக்கு ஏற்பட்டது. 

திடீரென வெள்ளப்பெருக்கு ஏற்பட்ட காரணத்தால் குளிக்க வந்த சுற்றுலா பயணிகள் எல்லாம் அலறி அடித்து ஓடினார்கள். திடீரென ஏற்பட்ட இந்த வெள்ளபெருகில் நெல்லையைச் சேர்ந்த சிறுவன் (17) அஸ்வின் என்பவர் அடித்து செல்லப்பட்டார். தனது குடும்பத்தினருடன் குளித்து கொண்டு இருந்த நிலையில், அவர் அடித்து செல்லப்பட்டார். 

இதனை தொடர்ந்து, சம்பவ இடத்திற்கு விரைந்து வந்த போலீசார் மற்றும் தீயணைப்புத்துறையினர் வெள்ளத்தில் அடித்து செல்லப்பட்ட அந்த சிறுவனை தேடும் பணியில் ஈடுபட்டனர். 3 மணி நேரம் தேடுதலுக்கு பிறகு சிறுவன் சடலமாக மீட்கப்பட்டுள்ளார். வனப்பகுதியினர் குறிப்பிட்ட இடம் ஒன்றை பார்வையிட்ட போது சிறுவனின் உடல் இருந்தது தெரிய வந்தது.

அருவியில் இருந்து சுமார் அரை கிலோ மீட்டர் தொலைவில் சிறுவனின் சடலம் மீட்கப்பட்டது. தற்போது பிரேத பரிசோதனைக்காக அவருடைய உடல் தென்காசி அரசு மருத்துவமனைக்கு அனுப்பிவைக்கப்பட்டுள்ளது. வெள்ளத்தில் சிக்கி அடித்துச் செல்லப்பட்டு சிறுவன் உயிரிழந்த சம்பவம் சோகத்தை ஏற்படுத்தியுள்ளது.