குறையும் எண்ணிக்கை.. அதிகரிக்கும் டிஸ்சார்ஜ்! கொரோனாவிலிருந்து குணமடைந்தோர் எண்ணிக்கை 6.12 லட்சத்தை கடந்தது!

தமிழகத்தில் கொரோனா தொற்றிலிருந்து குணமடைந்தோர் எண்ணிக்கை 6.12 லட்சத்தை கடந்துள்ளது.

தமிழகத்தில் கொரோனா பரவல் குறைய தொடங்கிய நிலையில், இன்று ஒரே நாளில் 4,666 பேருக்கு கொரோனா தொற்று உறுதிசெய்யப்பட்டுள்ளது. இதனால் கொரோனா பாதித்தோரின் எண்ணிக்கை 6,65,930 ஆக அதிகரித்துள்ளது. இதில் அதிகபட்சமாக சென்னையில் ஒரே நாளில் 1,164 பேருக்கு கொரோனா தொற்று உறுதியாகியுள்ளது. இதனால் சென்னையில் கொரோனாவால் பாதிக்கப்பட்டவர்கள் எண்ணிக்கை 1,84,429 ஆக அதிகரித்துள்ளது.

தமிழகத்தில் கொரோனா பரவல் குறையும் நிலையில், குணமடைந்தோர் எண்ணிக்கை அதிகரித்து கொண்டே வருகிறது. அந்தவகையில் 5,177 பேர் குணமடைந்து வீடு திரும்பிய நிலையில், குணமடைந்தோர் எண்ணிக்கை 6,12,320 ஆக அதிகரித்துள்ளது. மேலும், கொரோனா தொற்றால் இன்று 57 பேர் உயிரிழந்த நிலையில், உயிரிழந்தோர் எண்ணிக்கை 10,371 ஆக அதிகரித்துள்ளது. இதில் தனியார் மருத்துவமனையில் 19 பேரும், அரசு மருத்துவமனையில் 38 பேர் உயிரிழந்துள்ளனர்.

மேலும் இன்று கொரோனா மட்டுமின்றி, மற்ற நோயால் பாதிக்கப்பட்ட 53 பேர் உயிரிழந்துள்ளதாகவும், கொரோனவால் மட்டும் பாதிக்கப்பட்ட 4 பேர் உயிரிழந்துள்ளனர். சென்னையில் இன்று 13 பேர் உயிரிழந்துள்ள நிலையில், உயிரிழந்தோரின் எண்ணிக்கை 3,441 ஆக அதிகரித்துள்ளது.

தமிழகத்தில் நாள் ஒன்றுக்கு சராசரியாக 50 முதல் 65 பேர் வரை கொரோனா தொற்றால் உயிரிழக்கும் நிலையில், 5000 முதல் 6000 பேர் வரை குணமடைந்து வருவது, சற்று ஆறுதல் அளித்து வருகிறது.