சிவகாசி பட்டாசு ஆலை விபத்து.! 2 பேர் உயிரிழப்பு.!

[File Image]

சிவகாசி: காளையார்குறிச்சியில் உள்ள தனியார் பாட்டாசு ஆலையில் ஏற்பட்ட விபத்தில் 2 பேர் உயிரிழந்துள்ளனர்.

விருதுநகர் மாவட்டம் சிவகாசி அருகே காளையார்குறிச்சியில் முருகன் என்பவருக்கு சொந்தமாக தனியார் பட்டாசு ஆலை இயங்கி வந்துள்ளது. இந்த ஆலையில் பல்வேறு அறைகள் உள்ளன. இதில் இன்று காலை குறிப்பிட்ட ரக பட்டாசு தயாரிக்கும் அறையில் 4 தொழிலாளர்கள் வேலை செய்து வந்துள்ளனர்.

அப்போது, பட்டாசுகளுக்கு இடையே ஏற்பட்ட உராய்வு காரணமாக விபத்து ஏற்பட்டதாக தெரிகிறது. இதில் சம்பவ இடத்திலேயே மாரியப்பன், முத்துமுருகன் எனும் 2 தொழிலாளர்கள் பரிதாபமாக உயிரிழந்துள்ளனர் என்று தகவல்கள் தெரிவிக்கின்றன.

விபத்து குறித்து அறிந்ததும், தீயணைப்பு துறையினர் மற்றும் மருத்துவ குழுவினர் சம்பவ இடத்திற்கு விரைந்துள்ளனர். அங்கு விபத்தில் சிக்கிய மேலும் 2 தொழிலாளர்களை மீட்டு அவர்களை சிவகாசி அரசு மருத்துவமனைக்கு மேல்சிகிச்சைக்காக அனுப்பி வைத்துள்ளனர். சம்பவ இடத்திற்கு தற்போது துணை ஆட்சியர் மற்றும் அரசு அதிகாரிகள் நேரில் ஆய்வு செய்து வருகின்றனர்.