ஸ்டெர்லைட் ஆலை இயங்காமல் இருப்பதற்கு அரசு உத்தரவு!வன்முறையை கட்டுக்குள் கொண்டு வர தவிர்க்க முடியாத சூழலில் நடவடிக்கை!முதலமைச்சர் பழனிசாமி 

வன்முறையை கட்டுக்குள் கொண்டு வர தவிர்க்க முடியாத சூழலில் நடவடிக்கை எடுக்கப்பட்டது என்று முதலமைச்சர் பழனிசாமி  தெரிவித்துள்ளார்.

தூத்துக்குடியில் ஸ்டெர்லைட் ஆலை விரிவாக்கத்திற்கு தடைவிதிக்கக் கோரி குமரெட்டியார்புரம் கிராம மக்கள் தொடர்ந்து 100வது நாளாக போராட்டத்தில் ஈடுபட்டு வருகின்றனர்.

ஸ்டெர்லைட் ஆலையை மூடக்கோரி தூத்துக்குடி தூய பனிமய மாதா பேராலயம் அருகே நூற்றுக்கும் மேற்பட்டோர் கருப்புக்கொடியுடன் போராட்டம் நடத்தினர். அவர்களுடன் போலீசார் பேச்சுவார்த்தை நடத்தி பார்த்தனர். ஆனால் போலீசாரின் பேச்சை கேட்காமல் அவர்கள் தொடர்ச்சியாக தங்களது போராட்டத்தை முன்னெடுத்தனர். ஸ்டெர்லைட் ஆலையை சுற்றி ஏற்கனவே 144 தடை உத்தரவு பிறப்பிக்கப்பட்டுள்ள நிலையில் பொதுமக்கள் தடை உத்தரவை பொருட்படுத்தாமல் ஸ்டெர்லைட் ஆலையை முற்றுகையிட முயன்றனர். அவர்களை போலீசார் தடுப்புகளை வைத்து தடுத்து பார்த்தனர். அப்போது போலீசாருக்கும் போராட்டக்காரர்களுக்கும் இடையே தள்ளுமுள்ளு ஏற்பட்டது.

அதேபோல தூத்துக்குடி மாவட்ட ஆட்சியர் அலுவலகம் அருகே ஸ்டெர்லைட் ஆலையை மூடக்கோரும் நடைபெற்ற போராட்டத்தில் பொதுமக்கள்- காவல்துறை இடையே மோதல் ஏற்பட்டது. அப்போது போராட்டக்காரர்கள் போலீஸ் வேனை கவிழ்த்ததோடு, போலீஸ் மீது கல்வீசித் தாக்குதல் நடத்தினர்.

போராட்டக்காரர்கள் கல்வீசித் தாக்கியதில் வணிக வளாகங்களின் கண்ணாடிகளில் சேதம் ஏற்பட்டது. அதேபோல போராட்டக்காரர்கள் மீது போலீசாரும் தடியடி நடத்தினர். தொடர்ச்சியாக பல இடங்களில் ஆயிரக்கணக்கான மக்கள் போராட்டத்தை முன்னெடுத்து வருவதால் போராட்டக்காரர்களை கட்டுப்படுத்த முடியாமல் போலீசார் திணறி வருகின்றனர்.

ஆயிரக்கணக்கான மக்கள் தூத்துக்குடியில் துரத்தியதால் போலீஸ் ஓட்டம் பிடித்தனர். காவல்துறையினர் மீது கற்களை வீசி போராட்டக்காரர்கள் தங்களது எதிர்ப்பை தெரிவித்து வருகின்றனர். வன்முறையில் ஈடுபட்டவர்களை கலைக்க போலீஸ் கண்ணீர் புகை வீசியது குறிப்பிடத்தக்கது.

இந்நிலையில் காவல்துறையினர் – போராட்டக்காரர்கள் இடையே ஸ்டெர்லைட் போராட்டத்தில் மோதல் ஏற்பட்டது. இதில் போலீஸ் துப்பாக்கிச்சூடு நடத்தியதில் ஒருவர் பலியானார். தற்போது மேலும், ஒருவர் உயிரிழந்துள்ளதாக தகவல் வெளியாகியுள்ளது. போலீஸார் சுட்டதில் பலியானோர் எண்ணிக்கை இரண்டாக உயர்ந்துள்ளது.இதில் 15 பேர் படுகாயம் என தகவல் வெளியாகியுள்ளது.

சற்று முன் தூத்துக்குடியில் ஸ்டெர்லைட்டுக்கு எதிரான போராட்டம் வன்முறையாக மாறியது குறித்து முதலமைச்சர் பழனிசாமி காவல் அதிகாரிகளுடன் அவசர ஆலோசனையில் ஈடுபட்டார்.இந்த ஆலோசனையில் டி.ஜி.பி உள்ளிட்ட உயர் அதிகாரிகளை ஈடுபட்டனர்.

இந்நிலையில் ஆலோசனை நிறைவு பெற்று பின் டிஜிபி ராஜேந்திரன் கூறியது, போராட்டம் தொடர்பாக தூத்துக்குடி பொதுமக்கள் யாரும் அச்சப்பட வேண்டாம். துப்பாக்கிச்சூடு நடந்ததா என்பது குறித்து விசாரணை நடைபெறுகிறது.மேலும் தூத்துக்குடியில் நிலையை கட்டுக்குள் கொண்டுவர கூடுதல் போலீஸார் அனுப்பப்பட்டுள்ளனர் என்று டிஜிபி ராஜேந்திரன் தெரிவித்துள்ளார்.

இந்நிலையில் ஆலோசனைக்கு பின் பேசிய முதலமைச்சர் பழனிசாமி, போராட்டத்தை கட்டுப்படுத்த முடியாத நிலையில் காவல்துறையினர் நடவடிக்கை எடுக்க நேரிட்டது. சட்டம் ஒழுங்கை பாதுகாக்கும் பொருட்டு கூடுதலாக காவல்துறையினர் தூத்துக்குடிக்கு அனுப்பப்பட்டனர்.ஸ்டெர்லைட் ஆலை இயங்காமல் இருப்பதற்கு அரசு உத்தரவிட்டுள்ளது என்றும்  முதலமைச்சர் பழனிசாமி தெரிவித்துள்ளார்.

“20 ஆயிரம் பேர் ஊர்வலமாக சென்ற போது வன்முறை வெடித்துள்ளது. “ஆட்சியர் அலுவலகம், வாகனங்கள் கல்வீசி தாக்கப்பட்டது.மேலும்  வன்முறையை கட்டுக்குள் கொண்டு வர தவிர்க்க முடியாத சூழலில் நடவடிக்கை எடுக்கப்பட்டது என்று முதலமைச்சர் பழனிசாமி  தெரிவித்துள்ளார்.

மேலும் செய்திகளுக்கு தினச்சுவடுடன் இணைந்திருங்கள்.