போலீஸ்காரர்கள் போல நடித்து சினிமா பாவனையில் திருட்டு !

சென்னை ராஜா அண்ணாமலைபுரம் கோவிந்தசாமி நகரை சேர்ந்தவர் மணி, 72 வயதான இவர், தனியார் அடுக்குமாடி குடியிருப்பில் காவலாளியாக உள்ளார். வழக்கம் போல தனது சைக்கிளில் வேலைக்கு சென்று கொண்டிருந்த அவரை ஆட்டோவில் வந்த 3 பேர் வழிமறித்து தாங்கள் போலீஸ்காரர்கள் என்றும்,குற்ற வழக்கொன்றில் விசாரிக்க வேண்டும் எனவும் கூறி ஆட்டோவில் வலுக்கட்டாயமாக ஏற்றியுள்ளனர்.

அங்கிருந்து அமைந்தகரை வரை அழைத்து சென்று அவரிடம் இருந்த தங்க மோதிரம், பணம், செல்போன் ஆகியவற்றை பறித்துக் கொண்டு அவரை வழியிலேயே இறக்கிவிட்டுச் சென்றுள்ளனர்.

இந்த சம்பவம் குறித்து அபிராமபுரம் போலீசார் அப்பகுதியில் உள்ள சிசிடிவி காட்சிகளை கைப்பற்றி ஆய்வு செய்து வருகின்றனர். போலீஸ்காரர்கள் எனக்கூறி மூதாட்டிகள், முதியவர்களை கவனத்தை திசை திருப்பி கொள்ளையடிக்கும் கும்பல், இது போன்று ஆட்டோவில் கடத்திச் சென்று வழிப்பறி செய்யும் சம்பவங்களும் அவ்வப்போது நடந்தேறி வருகிறது.