பெண்களுக்கு எதிரான பாலியல் துன்புறுத்தல் புகார்களை தெரிவிக்க தமிழக அரசு புதிய திட்டம்!

தமிழக அரசு, பெண்களுக்கு எதிரான பாலியல் துன்புறுத்தல் குறித்த புகார்களை மின்னஞ்சல் மூலம் தெரிவிக்க ஷீ பாக்ஸ் ((SHE-BOX)) என்ற புதிய திட்டம் தொடங்கப்பட்டுள்ளதாக,  தெரிவித்துள்ளது.

சட்டப்பேரவையில் சமூகநலம் மற்றும் சத்துணவுத்துறையின் கொள்கை விளக்க குறிப்பு தாக்கல் செய்யப்பட்டது. அதில், பாதிக்கப்பட்ட பெண்கள், காவல்துறை மற்றும் மருத்துவமனைகளை எந்த நேரத்திலும் தொடர்பு கொள்ளும் திட்டத்தை செயல்படுத்த நிதி ஒதுக்கப்பட்டுள்ளதாக கூறப்பட்டுள்ளது. அதேபோல், பெண்களுக்கு எதிரான பாலியல் துன்புறுத்தல் குறித்த புகார்களை மின்னஞ்சல் மூலம் தெரிவிக்க ஷீ பாக்ஸ் ((SHE-BOX)) என்ற புதிய திட்டம் தொடங்கப்பட்டுள்ளதாகவும், இந்த திட்டத்தின் மாநில ஒருங்கிணைப்பாளராக, சமூக நல ஆணையரே நியமிக்கப்பட்டுள்ளதாகவும் தெரிவிக்கப்பட்டுள்ளது.

இத்திட்டத்தில் மாவட்ட அளவில் புகார்களை விசாரிக்க மாவட்ட சமூக நல அலுவலர்களே, மாவட்ட ஒருங்கிணைப்பாளர்களாக நியமிக்கப்பட்டுள்ளதாகவும், இதற்காக அவர்களுக்கு பயிற்சிகள் வழங்கப்பட்டுள்ளதாகவும் கூறப்பட்டுள்ளது.

மேலும், கேள்வி ஒன்றுக்கு பதிலளித்த அமைச்சர் சரோஜா, தாலிக்கு தங்கம் வழங்கும் திட்டத்திற்கு ஆன்லைன் மூலம் விண்ணப்பிக்க வேண்டும் என்றும், கேட்கப்பட்ட சான்றிதழ்களில் ஒன்று இல்லாவிட்டாலும் விண்ணப்பம் நிராகரிக்கப்படும் என்றும் தெரிவித்தார்.

இதையடுத்துப் பேசிய முதலமைச்சர் எடப்பாடி பழனிசாமி, தாலிக்கு தங்கம் வழங்கும் திட்டத்தை ஏழைகளுக்காக அறிமுகப்படுத்திய ஜெயலலிதா, பெண் கல்வியை ஊக்குவிக்கும் வகையில் பட்டதாரிகளுக்கு நிதியுதவியை உயர்த்தியதாக தெரிவித்தார்.

மேலும் செய்திகளுக்கு தினச்சுவடுடன் இணைந்திருங்கள்.