புதுச்சேரியில் தமிழக அரசுப் பேருந்துக்கு தீவைக்கப்பட்ட சம்பவம் தொடர்பாக 6 பேர் மீது வழக்குப்பதிவு !

தமிழக அரசுப் பேருந்துக்கு  புதுச்சேரியில் தீவைக்கப்பட்ட சம்பவம் தொடர்பாக 6 பேர் மீது வழக்குப்பதிவு செய்யப்பட்டுள்ளது.

புதுச்சேரியில் இருந்து கிழக்கு கடற்கரை சாலை வழியாக நேற்று மாலை தமிழக அரசு பேருந்து ஒன்று சென்னை நோக்கி சென்று கொண்டிருந்தது. அந்தப் பேருந்தை காலப்பட்டு பகுதியில் வழிமறித்த மர்மநபர்கள், அதில் இருந்த பயணிகள் அனைவரையும் கீழே இறங்குமாறு வற்புறுத்தினர். இதை அடுத்து பெட்ரோல் ஊற்றி பேருந்தை எரித்து விட்டு அவர்கள் தப்பி ஓடினர்.

சிறிது நேரத்தில் தீ மளமளவெனப் பரவி பேருந்து முழுவதையும் சூழ்ந்து கொண்டது. தகவல் அறிந்து காலாப்பட்டு தீயணைப்புத்துறையினர் வருவதற்குள் பேருந்து முழுவதும் எரிந்து சேதம் அடைந்தது.

பேருந்து தீப்பிடித்து எரிந்த போது அவ்வழியாகச் சென்ற புதுச்சேரி முதலமைச்சர் நாராயணசாமி, இதுகுறித்து விசாரணை மேற்கொண்டதுடன், கடும் நடவடிக்கை எடுக்க வேண்டும் என்று உத்தரவிட்டார். வீடியோ காட்சிகளின் அடிப்படையில் பொம்மையார்பாளையம் பகுதியை சார்ந்த 6 பேர் மீது 9 பிரிவுகளின் கீழ் காலாப்பட்டு போலீசார் வழக்குப்பதிவு செய்து, தனிப்படை அமைத்து அவர்களை தேடி வருகின்றனர்.

மேலும்  செய்திகளுக்கு தினச்சுவடுடன் இணைந்திருங்கள்.