பலத்த காற்றுடன் தமிழகத்தின் தென்கடலோர மாவட்டங்களில் கடல் சீற்றம்!

தமிழகத்தின் தென்கடலோர மாவட்டங்களில் கேரளாவில் தென்மேற்கு பருவமழை தொடங்கிய நிலையில் பலத்த காற்றுடன், கடல் சீற்றமாக காணப்படுகிறது.

கேரளா மற்றும் வடக்கு மற்றும் வடகிழக்கு மாநிலங்களுக்கு பெருமளவு மழையைக் கொடுக்கும் தென்மேற்கு பருவமழை மே கடைசி வாரத்தில் தொடங்குகிறது. இந்த ஆண்டில் சரியான நேரத்தில் தொடங்கியுள்ள பருவமழை அந்தமான் நிகோபார் தீவுகளில் கடந்த 26ம் தேதி தொடங்கியது.

கேரளாவில் திருவனந்தபுரம், புனலூர், கொல்லம், ஆலப்புழா உள்ளிட்ட இடங்களில் மாலை முதல் தென்மேற்கு பருவமழை தொடங்கியதாக தெரிவிக்கப்பட்டுள்ளது. இதனிடையே பருவமழை காரணமாக தமிழகத்தின் தென்கடலோர மாவட்டங்களில் கடல் சீற்றத்துடன் காணப்படுகிறது.

இராமேஸ்வரம் அருகே உள்ள தனுஷ் கோடியில் கடல் கொந்தளிப்புடன் காணப்படுகிறது. பலத்த காற்றுடன் கடல் அலைகள் சீற்றமாக உள்ளன. 20 அடி உயரம் வரை ராட்சத அலைகள் எழுவதால் பார்ப்பவர்களுக்கு அச்சமூட்டும் வகையில் உள்ளது.  கடல்சீற்றம் காரணமாக நாட்டுப்படகு மீனவர்கள் யாரும் மீன் பிடிக்கச் செல்லவில்லை.

கன்னியாகுமரி மாவட்டத்திலும் கடல் அலைகள் சீற்றத்துடன் எழுகின்றன. கேரள எல்லைப் பகுதியான வள்ளவிளை, மார்த்தாண்டம், நீரோடி கடலோரப் பகுதிகளில் பெரிய அலைகளாக வந்து கரைகளை தாக்கியதில் 4 வீடுகள் இடிந்து விழுந்தன. வள்ளவிளை, குழித்துறை இடையே இயக்கப்பட்ட அரசுப்பேருந்தின் மேற்கூரை காற்றின் வேகத்தால் தூக்கி வீசப்பட்டது. குமரிமுனையில் கடல் சீற்றம் காரணமாக திருவள்ளுவர் சிலை மற்றும் விவேகானந்தர் நினைவு மண்டபத்துக்கான படகு சேவை நிறுத்தப்பட்டது.

இதே போன்று தூத்துக்குடி மாவட்டத்திலும் கடல் அலைகள் சீற்றத்துடன் காணப்பட்டதால் நாட்டுப்படகு மீனவர்கள் மீன் பிடிக்க செல்லவில்லை.

மேலும்  செய்திகளுக்கு தினச்சுவடுடன் இணைந்திருங்கள்.