திருவண்ணாமலை நன்கொடை வழங்குவதாகக் கூறி வள்ளலார் ஆசிரமத்தில் மேலாளரைக் கட்டிப் போட்டு கொள்ளை!

மர்மநபர்கள் ,திருவண்ணாமலை வள்ளலார் ஆசிரமத்தின் மேலாளர் மற்றும் உதவியாளரை கட்டிப் போட்டு கொள்ளை அடித்துச் சென்ற சம்பவம் குறித்து போலீசார் விசாரணை நடத்தி வருகின்றனர். நேற்றிரவு ஆசிரமத்தின் மேலாளர் கலைநம்பியை தொலைபேசியில் தொடர்பு கொண்ட மர்மநபர்கள், நன்கொடை கொடுக்க வந்துள்ளதாக கூறியுள்ளனர்.

இதை அடுத்து அவர்களை கலைநம்பி, ஆசிரமத்திற்குள் அனுமதித்துள்ளார். உள்ளே சென்றதும் கலைநம்பியை தாக்கிய மர்மநபர்கள், அவரை இருக்கையில் கட்டிப் போட்டதுடன், அவரது உதவியாளர் பாலம்மாள் என்ற மூதாட்டியை வேறு ஒரு அறைக்குள் வைத்து பூட்டினர்.

பாலம்மாளின் அறைக்குச் சென்ற மர்மநபர்கள் அவரது மகளின் 25 சவரன் நகைகளை கொள்ளை அடித்தனர். 25 ஆயிரம் ரொக்கத்தையும் திருடி விட்டு மாயமாகினர். இதுகுறித்து கிராமிய காவல் நிலைய போலீசார், மோப்ப நாய் உதவியுடன் தடயங்களை சேகரித்து விசாரணை மேற்கொண்டு வருகின்றனர்.