திணற போகும் தீபாவளி…லாரி உரிமையாளர்கள் மீண்டும் ஸ்டிரைக்..பொதுமக்கள் அதிருப்தி…!!

மத்திய அரசு அளித்த உறுதிமொழிகளை நிறைவேற்றாததை கண்டித்து தீபாவளி பண்டிகைக்கு பின் மீண்டும் நாடு தழுவிய வேலைநிறுத்தம் மேற்கொள்ள போவதாக லாரி உரிமையாளர்கள் அறிவித்துள்ளனர்.
லாரி உரிமையாளர்கள் ஏற்கனவே கடந்த ஜூலை மாதம் 20-ந் தேதி முதல் 8 நாட்கள் வேலை நிறுத்தத்தில் ஈடுபட்டனர்.இந்த போராட்டத்தில் டீசல், சுங்க கட்டணம், 3-ம் நபர் காப்பீட்டுத் தொகை ஆகியவற்றின் உயர்வை கட்டுப்படுத்த வேண்டும் என கோரிக்கை விடுக்கப்பட்டது. அப்போது மத்திய அரசு பேச்சுவார்த்தை நடத்தி கோரிக்கைகளை நிறைவேற்றுவதாக உறுதியளித்தது. ஆனால் 3 மாதங்களுக்கு மேல் ஆகியும் கண்டுகொள்ளவில்லை.
மேலும் டீசல் விலை தொடர்ந்து உயர்ந்து வருவதால் லாரி உரிமையாளர்கள் கடுமையாக பாதிக்கப்பட்டு வருகிறார்கள். லாரி தொழிலை விட்டு வேறு தொழிலுக்கும் மாறி வருகிறார்கள்.
இதற்கிடையே அடுத்த கட்ட நடவடிக்கைகள் குறித்து டெல்லியில் கடந்த 2 நாட்களுக்கு முன்பு மோட்டார் காங்கிரஸ் நிர்வாகிகள் ஆலோசனை நடத்தினர். அதில் மத்திய அரசு அளித்த உறுதிமொழிகளை நிறைவேற்றாததை கண்டித்து தீபாவளி பண்டிகைக்கு பின் மீண்டும் நாடு தழுவிய வேலைநிறுத்தம் மேற்கொள்ள உறுதி செய்யப்பட்டது.இதனால் அகில இந்திய அளவில் 70 லட்சம் லாரிகளும், தமிழகத்தில் 4.5 லட்சம் லாரிகளும் ஓடாது. இந்த தொழிலை நம்பி உள்ள 1½ கோடிக்கும் மேலான தொழிலாளர்கள் வேலை இழக்கும் அபாயம் உள்ளது. மேலும் அத்தியாவசிய பொருட்கள் விலை உயரவும் வாய்ப்பு உள்ளது.
இதுகுறித்து தமிழ்நாடு மாநில லாரி உரிமையாளர் சம்மேளன செயலாளர் தன்ராஜ் கூறியதாவது:-
லாரி உரிமையாளர்களின் கோரிக்கைகளை 3 மாதங்கள் ஆகியும் மத்திய அரசு நிறைவேற்ற எந்த நடவடிக்கையும் எடுக்கவில்லை. டீசல் விலை 80 ரூபாயை நெருங்கி உள்ளதால் லாரி தொழில் முடங்கும் நிலை ஏற்பட்டுள்ளது. இதனால் அகில இந்திய மோட்டார் காங்கிரஸ் முடிவுப்படி தீபாவளிக்கு பிறகு வேலை நிறுத்த போராட்டத்தில் ஈடுபடுவதை தவிர வேறு வழியில்லை. எனவே மத்திய அரசு வேலை நிறுத்தம் தொடங்கும் முன்பு பேச்சுவார்த்தை நடத்தி பிரச்சினையை முடிவுக்கு கொண்டுவர நடவடிக்கை எடுக்க வேண்டும்.இவ்வாறு அவர் கூறினார்.தீபாவளி அடுத்தவாரம் நெருங்கும் சூழலில் லாரி ஸ்டிரைக்_கால் அனைத்து வகை பொருட்களின் விலையும் உயர வாய்ப்புள்ளது.
dinasuvadu.com