ஜெயலலிதாவின் ஆடியோ ஆறுமுகசாமி ஆணையத்திடம் ஒப்படைக்கப்பட்ட பின் வெளியானதால் அதிர்ச்சி!வழக்கறிஞர் ராஜாசெந்தூர் பாண்டியன்

சசிகலா தரப்பு வழக்கறிஞர் ராஜாசெந்தூர் பாண்டியன் ,ஆறுமுகசாமி ஆணையத்திடம் ஒப்படைக்கப்பட்ட ஜெயலலிதாவின் ஆடியோ வெளியானதால் தாங்கள் அதிர்ச்சி அடைந்ததாக தெரிவித்தார்.

ஐஏஎஸ் அதிகாரிகள், காவல்துறை அதிகாரிகள், முன்னாள் தலைமைச் செயலாளர் உள்ளிட்ட பல்வேறு நபர்களை நீதிபதி ஆறுமுகசாமி ஆணையம் விசாரித்து வருகிறது. ஜெயலலிதாவின் அண்ணன் மகன் தீபக், தமிழக அரசின் கலை மற்றும் பண்பாட்டுத்துத் துறை ஆணையர் ராமலிங்கம், ஜெயலலிதாவிடம் உதவியாளராக இருந்த பூங்குன்றன், சசிகலா உதவியாளர் கார்த்திகேயன் ஆகிய 4 பேர் இன்று ஆஜராகினர். ஆணையம் விசாரித்த சாட்சியங்களை சசிகலா தரப்பு வழக்கறிஞர்கள் குறுக்குவிசாரணை செய்து வரும் நிலையில், ராமலிங்கம், தீபக், பூங்குன்றனிடம் குறுக்குவிசாரணை நடைபெற்றது.

இதைத் தொடர்ந்து செய்தியாளர்களிடம் பேசிய சசிகலா தரப்பு வழக்கறிஞர் ராஜா செந்தூர்பாண்டியன், ஜெயலலிதாவை சசிகலா மிகவும் பிரியமாக பார்த்துக் கொண்டார் என்பதை தீபக் உறுதிசெய்ததாகக் கூறினார். ஜெயலலிதாவுக்கு கார்டியாக் அரெஸ்ட் ஏற்பட்டது தொடர்பாக தமக்கு எவ்வித ஐயமும் இல்லை என தீபக் கூறியதாகவும் அவர் தெரிவித்தார். ஆறுமுகசாமி ஆணையத்திடம் ஒப்படைக்கப்பட்ட ஜெயலலிதாவின் ஆடியோ வெளியானதால் தாங்கள் அதிர்ச்சி அடைந்ததாகவும் ராஜா செந்தூர்பாண்டியன் கூறினார்.

மேலும் செய்திகளுக்கு தினச்சுவடுடன் இணைந்திருங்கள்.