ஆதிச்சநல்லூர் அகழாய்வு-தமிழக அரசுக்கு நீதிமன்றம் புதிய உத்தரவு…!!

ஆதிச்சநல்லூர் அகழாய்வின் போது கிடைத்த பொருட்களை, கார்பன் பரிசோதனைக்கு அனுப்புவதற்கான நிதியை, 2 வாரங்களில் ஒதுக்க வேண்டும் என தமிழக அரசுக்கு உயர்நீதிமன்ற மதுரை கிளை உத்தரவிட்டுள்ளது. அகழாய்வு நடைபெற்ற இடத்தில் மணல் குவாரி நடத்தப்படுவதாக புகார் எழுந்த நிலையில், தூத்துக்குடி மாவட்ட ஆட்சியர் நேற்று நீதிமன்றத்தில் நேரில் ஆஜராகி, அதுபோல மணல் குவாரி எதுவும் செயல்படவில்லை எனவும், உரிமம் எதுவும் வழங்கப்படவில்லை எனவும் நீதிபதிகள் முன் தெரிவித்தார். இதனையடுத்து, அகழாய்வு நடைபெற்ற இடத்தை சுற்றி, வேலி அமைத்து பாதுகாக்கவும், அங்கு ஒரு புறக்காவல் நிலையம் அமைக்கவும் உத்தரவிட்ட நீதிமன்றம், ஆதிச்சநல்லூர் அகழாய்வின் போது கிடைத்த பொருட்களை, கார்பன் பரிசோதனைக்கு அனுப்புவதற்கான நிதியை 2 வாரங்களில் ஒதுக்க தமிழக அரசிற்கு உத்தரவிட்டுள்ளது. மேலும், இந்த வழக்கை பிப்ரவரி 19-ம் தேதிக்கு ஒத்திவைத்துள்ளனர் என்பது குறிப்பிடத்தக்கது.