உள்துறை அமைச்சர் அமித்ஷா தனது பதவி விலக வேண்டும்.!மே.வங்க முதல்வர் மம்தா பேனர்ஜி விமர்சனம்.!

ஆட்சி கவிழும் என மிரட்டல் விடுத்த உள்துறை அமைச்சர் அமித்ஷா தனது பதவியில் இருந்து ராஜினாமா செய்ய வேண்டும் என மேற்கு வங்க முதல்வர் மம்தா பேனர்ஜி கூறினார்.  

மேற்கு வங்க முதல்வர் மம்தா பானர்ஜி  கொல்கத்தாவில் நேற்று செய்தியாளர்களை சந்தித்து பல்வேறு கருத்துக்களை குறிப்பிட்டு பேசினார். குடியுரிமை திருத்த சட்டத்தை மேற்கு வங்கத்தில் அமல்படுத்துவது, உத்திரபிரதேச என்கவுண்டர்கள், மத்திய அமைச்சர் அமித்ஷா என பல்வேறு கருத்துக்களையும் அவர் நேற்று கூறியிருந்தார்.

5 தொகுதிகளை வெல்லுங்கள் :

அவர் பேசுகையில், மேற்கு வங்கத்தில் வரும் பொது தேர்தலில் 35 இடங்களை பாஜக கைப்பற்றினால் ஆட்சியை கவிழ்த்து விடலாம் என்று உள்துறை அமைச்சர் அமித்ஷா பேசியிருப்பது கண்டிக்கத்தக்கது என மம்தா தெரிவித்தார். முதலில் மேற்கு வங்கத்தில் ஒரு ஐந்து தொகுதிகளை வெல்ல முயற்சி செய்யுங்கள். பிறகு 35இல் வெற்றி பெறுவது பற்றி நினைக்கலாம் என அமித்ஷா கருத்துக்கு தனது விமர்சனத்தை முன் வைத்தார் மேற்குவங்க முதல்வர் மம்தா பானர்ஜி.

அமித்ஷா ராஜினாமா :

மேலும், மத்திய அமைச்சர் அமித்ஷா பற்றி பேசுகையில், நாட்டை காப்பாற்ற மத்திய உள்துறை அமைச்சர் முயற்சி செய்ய வேண்டும். அதனை விடுத்து அரசை கவிழ்க்க உள்துறை அமைச்சர் முயற்சி செய்கிறார். 2025ஆம் ஆண்டுக்குள் மேற்கு வங்கத்தில் எங்கள் ஆட்சி (திரிணாமுல் காங்கிரஸ்) கவிழும் என பகிரங்கமாக மிரட்டல் விடுகிறார். நாட்டை அமைதி படுத்த வேண்டும் என்று உறுதிமொழி எடுத்து வந்த உள்துறை அமைச்சர் இவ்வாறு பேசியதற்கு அவர் தனது பதவியை ராஜினாமா செய்ய வேண்டும் எனவும் முதல்வர் மம்தா பானர்ஜி கேட்டுக்கொண்டார்.

மக்கள் குரல் கொடுக்க வேண்டும் :

மேலும், பேசிய அவர், மேற்கு வங்கத்தில் எக்காரணம் கொண்டும் குடியுரிமை திருத்த சட்டம் மற்றும் குடிமக்கள் மசோதாவை நிறைவேற்ற அனுமதிக்க மாட்டோம் என கூறினார். மேலும், உத்தர பிரதேசத்தில் அண்மையில் நடக்கும் அதிக என்கவுண்டர்கள் மற்றும் உயிரிழப்புகள் குறித்து பேசிய அவர், உத்திர பிரதேசத்தில் என்கவுண்டர் என்பது வழக்கமான ஒன்றாக மாறிவிட்டது. இதனை எதிர்த்து மக்கள் தான் போராட வேண்டும் என்று குறிப்பிட்டு பேசினார் மேற்கு வங்க முதல்வர் மம்தா பேனர்ஜி.