மக்களவையில் நிறைவேறியது வக்பு சட்டத்திருத்த மசோதா! எதிர்ப்பு தெரிவித்த எதிர்கட்சி தலைவர்கள்!

டெல்லி : வக்பு வாரிய திருத்த சட்டமானது இன்று நாடாளுமன்றத்தில் தாக்கல் செய்யப்பட்டது. இந்த சட்ட திருத்தத்தை மத்திய சிறுபான்மை மற்றும் நாடாளுமன்ற விவகாரத்துறை அமைச்சர் கிரண் ரிஜிஜூ தாக்கல் செய்தார். இந்த மசோதாவுக்கு ஆதரவாக 288 உறுப்பினர்களும், எதிராக 232 உறுப்பினர்களும் வாக்களித்தனர். 8 மணி நேரத்திற்கு மேலாக நடந்த விவாதத்திற்குப் பிறகு, பெரும்பான்மை வாக்குகளுடன் இது நிறைவேற்றப்பட்டது.

இந்த மசோதா வக்பு சொத்துக்களின் நிர்வாகத்தை மேம்படுத்துவதற்கும், வெளிப்படைத்தன்மையை உறுதி செய்வதற்கும் உருவாக்கப்பட்டதாக அரசு தெரிவித்துள்ளது. மத்திய சிறுபான்மை நலத்துறை அமைச்சர் கிரண் ரிஜிஜு இதனை மக்களவையில் தாக்கல் செய்தபோது இது இப்போது “ஒருங்கிணைந்த வக்பு நிர்வாகம், அதிகாரமளித்தல், திறன் மற்றும் மேம்பாட்டு (UMEED) மசோதா” என மறுபெயரிடப்பட்டுள்ளது எனவும் பேசினார்.

எதிர்ப்பு தெரிவித்த எதிர்க்கட்சிகள்

ஆ. ராசா (திமுக)

• திருத்தநகரி நாடாளுமன்ற உறுப்பினரான ஆ. ராசா, இந்த மசோதாவை தாக்கல் செய்தவுடன் எதிர்ப்பு தெரிவித்து பேசினார். இது குறித்து அவர் பேசுகையில்  “முஸ்லிம் சமூகத்திற்கு எதிரானது” என்று கடுமையாக விமர்சித்தார். “பாஜகவில் ஒரு இஸ்லாமிய எம்.பி. கூட இல்லாதபோது, அவர்கள் இஸ்லாமியர்களின் உரிமைகளை எப்படி பாதுகாப்பார்கள்?” என்று கேள்வி எழுப்பினார். மேலும், “வக்பு சொத்துகளை மத்திய அரசு அபகரிக்க முயல்கிறது” என்று குற்றம்சாட்டினார்.

கே.சி. வேணுகோபால் (காங்கிரஸ்)

• காங்கிரஸ் எம்.பி. கே.சி. வேணுகோபால், “இந்த மசோதா மத நம்பிக்கைக்கு எதிரானது” என்று தெரிவித்தார். “முஸ்லிம்கள் அல்லாதவர்கள் வக்பு வாரியத்தில் உறுப்பினர்களாக இருப்பது இஸ்லாமிய சட்டங்களுக்கு முரணானது” என்று வாதிட்டார். மேலும், “இதை அறிமுகப்படுத்தும்போது உறுப்பினர்களுக்கு திருத்தங்களை முன்மொழியும் உரிமை வழங்கப்படவில்லை” என்று குறை கூறினார்.

ராஜீவ் சுக்லா (காங்கிரஸ்)

• “இந்த மசோதாவுக்கு பொது ஒப்புதல் உருவாக்கப்படவில்லை” என்று ராஜீவ் சுக்லா கூறினார். “வக்பு சட்டத்தில் சில விதிகள் நியாயமற்றவை, இதை எதிர்க்கட்சிகளுடன் ஆலோசித்து முடிவு செய்ய வேண்டும்” என்று வலியுறுத்தினார்.

ராஜா ராம் சிங் (காங்கிரஸ்)

• “மோடி அரசு இந்த மசோதாவை முஸ்லிம்களை பழிவாங்க கொண்டுவந்துள்ளது” என்று ராஜா ராம் சிங் குற்றம்சாட்டினார். “முஸ்லிம்கள் பாஜகவுக்கு ஆதரவு தரவில்லை என்பதால் இது கொண்டுவரப்பட்டுள்ளது” என்று பேசினார்.

மல்லிகார்ஜுன கார்கே (காங்கிரஸ் தலைவர்)

• “இது முஸ்லிம்களுக்கு மட்டுமல்ல, அரசியலமைப்புக்கே எதிரானது” என்று கார்கே விமர்சித்தார். “இது அம்பேத்கரின் சமத்துவம், கூட்டாட்சி மற்றும் சிறுபான்மை உரிமைகளுக்கு எதிரான தாக்குதல்” என்று கூறினார்.

வைத்திலிங்கம் (காங்கிரஸ்)

• “இந்த மசோதா சிறுபான்மையினருக்கு, குறிப்பாக முஸ்லிம்களுக்கு தீங்கு விளைவிக்கும். இது முஸ்லிம் சமூகத்திற்கு ஒரு கறுப்பு நாள்” என்று தெரிவித்தார்.

இருப்பினும், இந்த எதிர்ப்புகள் மத்தியில், மசோதா பெரும்பான்மை வாக்குகளுடன் நிறைவேறியது. இதற்கு எதிர்ப்பு தெரிவித்து பல இடங்களில் போராட்டங்கள் நடைபெற்றன. உதாரணமாக சென்னையில், தமிழ்நாடு முஸ்லிம் முன்னேற்றக் கழகம் மற்றும் பிற இஸ்லாமிய அமைப்புகள் சிறு அளவிலான ஆர்ப்பாட்டங்கள் நடத்தினர். அதைப்போல பீகாரில் எதிர்ப்பு தெரிவித்து சில இடங்களில் போராட்டங்கள் நடைபெற்றது.