முத்ரா திட்டத்தின் கீழ் கோடிக்கணக்கான மக்கள் பயன்பெற்றனர் : மோடி ..!

தொழில்முனைவோருக்கான முத்ரா கடனுதவி திட்டத்தின் கீழ் 6 லட்சம் கோடி ரூபாய் கடன் வழங்கப்பட்டிருப்பதாகவும், 12 கோடி பேர் பயன்பெற்றிருப்பதாகவும் பிரதமர் மோடி தெரிவித்துள்ளார்.

சிறு, குறு தொழில்களுக்கு 10 லட்ச ரூபாய் வரை கடனுதவி வழங்கும் பிரதம மந்திரி முத்ரா யோஜனா திட்டம், கடந்த 2015ஆம் ஆண்டு ஏப்ரலில் மோடியால் தொடங்கி வைக்கப்பட்டது.

இந்த திட்டத்தினால் பயனடைந்தவர்களுடன் பிரதமர் மோடி நமோ ஆப் மூலம் கலந்துரையாடினார். தொழில் தொடங்கவும், தொழிலை விரிவுபடுத்தவும் விரும்பும் இளைஞர்கள் மற்றும் பெண்களுக்கு முத்ரா திட்டம் புதிய வாய்ப்புகளை திறந்துவிட்டுள்ளதாகவும், வேலைவாய்ப்புகளை பெருக்கும் வகையில் அமைந்திருப்பதாகவும் அவர் கூறினார்.

முத்ரா திட்டத்தினால் பயனடைந்துள்ள 12 கோடி பேரில் 28 சதவீதம்பேர், முதல்முறை தொழில்முனைவோர் என்று அவர் தெரிவித்தார். பயன்பெற்றவர்களில் 74 சதவீதம் பேர், அதாவது 9 கோடி பேர் பெண்கள் என்றும் மோடி கூறினார். எஸ்சி, எஸ்டி மற்றும் இதர பிற்படுத்தப்பட்ட பிரிவைச் சேர்ந்த 55 சதவீதம் பேர் முத்ரா திட்டத்தால் பயன்பெற்றிருப்பதாகவும் பிரதமர் மோடி புள்ளிவிவரம் அளித்துள்ளார்.