யானைகளை குறிவைக்கும் அரிய வகை வைரஸ்…! 10 நாட்களில் 2 யானை குட்டிகள் உயிரிழப்பு…!

திருவனந்தபுரத்தில் கோட்டூர் அருகே காப்புக்காடு யானைகள் முகாமில் அரிய வகை வைரஸ் தாக்கி 2 குட்டி யானைகள் பலி.

கேரள மாநிலம், திருவனந்தபுரத்தில் கோட்டூர் அருகே காப்புக்காடு யானைகள் முகாம் உள்ளது. இங்கு 50-க்கும் மேற்பட்ட யானைகள் உள்ள நிலையில், இந்த முகாமில் உள்ள யானைகளை ஹெர்ப்ஸ் என்ற அரியவகை வைரஸ் தாக்கி வருகிறது. இந்நிலையில் இந்த வைரஸ் தாக்குதலினால் கடந்த 10 நாட்களில் ஸ்ரீ குட்டி மற்றும் அர்ஜுன் என்ற இரண்டு குட்டிகள் உயிரிழந்துள்ளது.

மேலும் இந்த முகாமில் கண்ணன், அமீனா ஆகிய குட்டி யானைகளும் வைரசால் பாதிக்கப்பட்டு சிகிச்சை பெற்று வருகிறது. இந்த இரண்டு குட்டிகளும் 4 வயதுக்கு உட்பட்டவை ஆகும். இந்த வகை வைரஸ் 1 முதல் 10 வயது வரை உள்ள குட்டி யானைகளை தான் தாக்குகிறது.

மேலும் இந்த வைரஸால் பாதிக்கப்பட்டு 48 மணி நேரத்திற்குள் யானைகள் இறந்து விடுவதாக கால்நடை மருத்துவர்கள் கூறுகின்றனர். இதனையடுத்து, கேரள வனத்துறை அமைச்சர் தலைமையில், அதிகாரிகள் குட்டி யானைகளை காக்க தீவிர நடவடிக்கைகளை மேற்கொண்டு வருகின்றனர்.