தொடர் அமளி.. 2ஆம் நாளாக முடங்கிய நாடாளுமன்றம்.!

ஆளும் கட்சி மற்றும் எதிர்க்கட்சியினர் தொடர் அமளியில் ஈடுப்பட்டதால், நாடாளுமன்ற மக்களவை 2வது நாளாக முடங்கியுள்ளது. மாநிலங்களவையிலும் தொடர் அமளி நிலவி வருகிறது.

பட்ஜெட் தொடர்பான ஆலோசனை கூட்டம் நேற்று நாடாளுமன்றத்தில் துவங்கியது. நேற்று முதலே, எதிர்க்கட்சியினர் மற்றும் ஆளும் கட்சியினர் இடையே தொடர் அமளி ஏற்பட்டதால் நேற்றும் நாடாளுமன்ற இரு அவைகளும் முடங்கியது.

அதே போல இன்றும், நாடாளுமன்ற கூட்டத்தொடர் காலை 11 மணிக்கு துவங்கியது முதல், ஆளும் கட்சியினர், ராகுல் காந்தி இங்கிலாந்தில், இந்தியா பற்றி உரையாற்றியதற்கு மன்னிப்பு கேட்க வேண்டும் எனவும் எதிர்கட்சியினர், அதானி குழும விவகாரம் குறித்து நாடாளுமன்ற விசாரணை குழு அமைக்க வேண்டும் எனவும் தொடர் அமளியில் ஈடுப்பட்டனர்.

இதனால் மதியம் 2 மணி வரை ஒத்திவைக்கப்பட்ட நாடாளுமன்ற அவைகள், தற்போது மக்களவை தொடங்கியதும் மீண்டும் அமளி ஏற்பட்டதால், தற்போது நாள் முழுவதும் மக்களவை ஒத்திவைக்கப்படுவதாக மக்களவை சபாநாயகர் ஓம் பிர்லா அறிவித்துள்ளார். 2 நாளாக நாடாளுமன்றம் முடங்கியுள்ளது.