பாகிஸ்தான் ராணுவத்தினர் அத்துமீறியத் தாக்குதல்..!

ஜம்மு-காஷ்மீர் எல்லைக்கு அப்பால் இருந்து பாகிஸ்தான் ராணுவத்தினர் நடத்திய அத்துமீறியத் தாக்குதலில், எல்லைப்பாதுகாப்புப் படை வீரர்கள் 2 பேர் உயிரிழந்தனர்.

காஷ்மீர் எல்லையில் அமைந்துள்ள அக்னூர் பகுதியில் அதிகாலையில் இந்திய நிலைகளை குறிவைத்து பாகிஸ்தான் ராணுவத்தினர் அத்துமீறித் தாக்குதல் நடத்தினர்.

துப்பாக்கியால் சுட்டும், சிறிய ரக மோட்டார் குண்டுகளையும் வீசித் தாக்குதல் நடத்தியதில், அக்னூர் பகுதியில் பாதுகாப்புப் பணியில் ஈடுபட்டிருந்த 2 ராணுவ வீரர்கள் உயிரிழந்தனர்.

இதையடுத்து, பாகிஸ்தான் படையின் அத்துமீறலுக்கு, இந்திய வீரர்கள் தொடர்ந்து பதிலடி கொடுத்து வருகின்றனர். முன்னதாக, ஜம்மு காஷ்மீரில் தீவிரவாதிகள் மூன்று இடங்களில் கையெறி குண்டுகளை வீசி தாக்குதல் நடத்தியதில், 4 ராணுவ வீரர்கள் உட்பட 8 பேர் காயம் அடைந்தனர்.