Government Jobs : புதுச்சேரியில் ஆசிரியர் காலிப்பணியிடங்கள் விரைவில் நிரப்பப்படும்.! அமைச்சர் நமச்சிவாயம்

நாளை செப்டம்பர் 5ஆம் தேதி டாக்டர் டாக்டர் ராதாகிருஷ்ணன் பிறந்தநாளை முன்னிட்டு நாடு முழுவதும் ஆசிரியர் தினம் கொண்டாடப்படுகிறது. அன்றைய தினம் நல்லாசிரியர்களுக்கு விருது வழங்கும் விழாக்களும் மாநிலங்கள் முழுவதும் நடைபெறும்.

அதேபோல, புதுச்சேரியிலும் நாளை வழங்க உள்ள விருது பட்டியல் வெளியாகியுள்ளது. 2023ஆம் ஆண்டுக்கான டாக்டர் ராதாகிருஷ்ணன் விருது 4 பேருக்கு வழங்கபட உள்ளது. முதல்வரின் சிறப்பு விருது 7 ஆசிரியர்களுக்கும், கல்வி அமைச்சரின் வட்டார விருது 10 பேருக்கும் என, மொத்தம் 21 பேருக்கு மாநில நல்லாசிரியர் விருது அறிவிக்கப்பட்டுள்ளது.

நாளை புதுச்சேரியில் காமராஜர் மணிமண்டபத்தில் நடைபெறும் ஆசிரியர் தின விழாவில், துணைநிலை ஆளுநர் தமிழிசை சௌந்தரராஜன், முதல்வர் ரங்கசாமி ஆகியோர் கலந்துகொண்டு மேற்கண்ட விருதுகளை வழங்க உள்ளனர்.

இந்த விருது பற்றி புதுச்சேரி உள்துறை மற்றும் கல்வித்துறை அமைச்சர் நமச்சிவாயம் கூறுகையில், சிறந்த நல்லாசிரியர் விருது வழங்குவதில் எவ்வித பாரபட்சமும் கட்டப்படவில்லை என்றும் அதற்கான தேர்வு கமிட்டி குழுவினர் தகுதியானவர்களை தேர்வு செய்துள்ளனர் எனவும் குறிப்பிட்டார்.

காலியாக உள்ள ஆசிரியர் பணியிடங்க்ளை நிரப்புவது பற்றி கூறுகையில், காரைக்காலில் ஆசிரியர் காலிப் பணியிடங்கள் விரைவில் நிரப்பப்படும் எனவும் புதுச்சேரி உள்துறை மற்றும் கல்வித்துறை அமைச்சர் நமச்சிவாயம் தெரிவித்தார்.