உத்தரகாண்டில் புதிதாக தேர்ந்தெடுக்கப்பட்ட எம்எல்ஏக்கள் இன்று பதவியேற்பு..! முதல்வர் யார்..?

உத்தர பிரதேசம், உத்தரகாண்ட், கோவா, மணிப்பூர் மற்றும் பஞ்சாப் ஆகிய மாநிலங்களில் சமீபத்தில் சட்டசபை தேர்தல் நடைபெற்றது. இந்த 5 மாநிலங்களில் 4 மாநிலங்களை பாஜக கைப்பற்றியது. பஞ்சாப்பில் காங்கிரஸ், பாஜகவை வீழ்த்தி ஆம் ஆத்மி வெற்றி பெற்றது.

உத்தரகாண்டில் பாஜக வெற்றி 

நடந்து முடிந்த உத்தரகாண்ட் சட்டசபை தேர்தலில் பா.ஜ.க அபார வெற்றி பெற்று ஆட்சியைத்தக்க வைத்தது. மொத்தம் உள்ள 70 இடங்களில் அந்தக் கட்சி 47 இடங்களை கைப்பற்றியது. ஆனால், அம்மாநில முதல்வர் புஷ்கர் சிங் தாமி காதிமா தொகுதியில் அதிர்ச்சி தோல்வி அடைந்தார். உத்தரகாண்ட் முதல்வர் தாமி, காங்கிரஸ் வேட்பாளர் புவன் சந்திர கப்ரியிடம் 6,579 வாக்குகள் வித்தியாசத்தில் தோல்வியடைந்தார். இதனையடுத்து, தற்போது புதிய முதல்வர் யார் என்ற கேள்வி எழுந்துள்ளது.

அமைச்சர்கள் பதவியேற்பு 

உத்தரகாண்ட் மாநிலத்தில் புதிதாக தேர்ந்தெடுக்கப்பட்டுள்ள எம்.எல்.ஏக்கள் சட்டசபையில் இன்று பதவியேற்கின்றனர். இதனை தொடர்ந்து இன்று மாலை நடைபெறும் பா.ஜ.க. எம்.எல்.ஏ.க்கள் கூட்டத்தில் புதிய முதல்வர் குறித்த முடிவுகள் எடுக்கப்படும் என்று உத்தரகாண்ட் மாநில பாஜக தலைவர் மதன் கவுசிக் தெரிவித்துள்ளார்.