Chandrayaan-3 Launch Live Updates: வெற்றிகரமாக விண்ணில் பாய்ந்தது சந்திரயான்-3

உலக நாடுகளே எதிர்பார்த்து காத்திருக்கும் இந்தியாவின் மூன்றாவது விண்கலமான சந்திரயான் 3 விண்கலம் இன்று பிற்பகல் விண்ணில் ஏவப்பட உள்ளது. அதன்படி, ஆந்திர மாநிலம், ஸ்ரீஹரிகோட்டாவில் சசதீஷ் தவான் விண்வெளி ஆய்வு மையத்தில் உள்ள 2வது ஏவு தளத்திலிருந்து, எல்.வி.எம் 3 – எம்4 ராக்கெட் மூலம் சந்திரயான் – 3 விண்கலம் இன்று பிற்பகல் 2:35 மணிக்கு விண்ணில் பாய்கிறது.

3,900 கிலோ எடை கொண்ட சந்திராயன் – 3 விண்கலத்தில் 7 விதமான ஆய்வு கருவிகள் பொருத்தப்பட்டுள்ளன. லேண்டர், ரோவர் உள்ளிட்டவையுடன் விண்ணில் பாயும் சந்திராயன் 3 விண்கலம், நிலவின் தரைப்பரப்பை ஆய்வு செய்யும். மேலும், நிலவின் தரைப்பரப்பில் மின்னூட்ட அதிர்வுகள், நிலநடுக்க அதிர்வுகள், தட்பவெப்ப நிலை உள்ளிட்டவை குறித்து ஆய்வு செய்யும் என தெரிவிக்கப்பட்டுள்ளது.

இதற்கான திட்ட செலவு 615 கோடி ரூபாயாகும். நிலவில் தரையிறங்க சந்திரயான் – 3 விண்கலம் 10 கட்டங்களாக பயணம் மேற்கொள்கிறது. பூமியில் இருந்து புறப்படும் எல்.வி.எம்.3 – எம்4 ராக்கெட், 179 கி.மீ., துாரம் உள்ள சுற்றுவட்ட பாதையில், சந்திரயான்-3 விண்கலத்தை நிலை நிறுத்தும். இதுவே முதல் கட்டமாகும். பின்னர் புவியின் நீள்வட்டப் பாதையில் விண்கலத்தை சுற்ற வைப்பது தான் இரண்டாவது கட்டமாகும். புவியின் சுற்றுவட்ட பாதையில் இருந்து 36,500 கி.மீ., துாரம் வரை சந்திரயான்-3 விண்கலம் அனுப்பப்படும்.

இதன்பின், உந்து இயந்திரம், ராக்கெட் போல் செயல்பட்டு, சந்திரயான் – 3 விண்கலத்தை, நிலவின் சுற்றுவட்ட பாதைக்கு திருப்பி, நிலவை நோக்கி பயணிக்க வைக்கும். சந்திராயன் 3 விண்கலம் நிலவை அடைய 40 நாட்கள் எடுத்து கொள்ளும் எனவும் கூறப்படுகிறது. இதனால், ஆகஸ்ட் 23 அல்லது 24ம் தேதி, சந்திரயான் – 3 விண்கலத்தில் உள்ள ரோவர், லேண்டர் சாதனம் தரையிறக்க இஸ்ரோ விஞ்ஞானிகள் திட்டமிட்டுள்ளனர். இந்த நிகழ்வுக்காகத்தான் இந்தியா மட்டுமின்றி உலகமே ஆவலுடன் காத்திருக்கிறது.