தலைநகரில் ஒவ்வொரு ஐந்து மணி நேரத்திற்கும் ஒரு பாலியல் வன்கொடுமை – காவல் துறை தகவல்

கடந்த ஆண்டு தொற்றுநோயால் பாதிக்கப்பட்ட சமயத்தில்  1,699 கற்பழிப்பு சம்பவங்கள், 2,186 பாலியல் வன்கொடுமைகள் மற்றும் குழந்தைகளுக்கு எதிரான 65 பாலியல் வன்கொடுமைகள் தொடர்பான சம்பவங்கள் டெல்லியில் பதிவாகியுள்ளதாக டெல்லி காவல் துறை தரப்பில் தகவல் தெரிவிக்கப்பட்டுள்ளது.

இருப்பினும், இந்த வழக்குகள் 2019 ஆம் ஆண்டினை ஒப்பிடும்போது குறைந்து உள்ளது. 2019 ஆம் ஆண்டின் புள்ளிவிவரங்கள் படி, 2,168 கற்பழிப்புகள், 2,921 பாலியல் வன்கொடுமை சம்பவங்கள் மற்றும் 109 போக்ஸோ வழக்குகள் பதிவாகியுள்ளன.டெல்லி காவல் துறை வெளியிட்டுள்ள தகவலின்படி, 2020 ஆம் ஆண்டில் கற்பழிப்பு வழக்குகளில் 1.77 சதவீதம் அந்நியர்கள் குற்றவாளிகள் என்றும் இது 2019-ஆம் ஆண்டில் 2.20 சதவீதமாக இருந்தது என்றும் காவல் துறை தெரிவித்துள்ளது.குற்றவாளிகளில் 44 சதவீதம் பேர் குடும்பம் அல்லது குடும்ப நண்பர்கள் என்றும் 26 % பிற அறியப்பட்ட நபர்கள் என்றும் தெரிவிக்கப்பட்டுள்ளது.

ஒட்டுமொத்தமாக,டெல்லி காவல்துறையினர் கடந்த ஆண்டு இந்திய தண்டனைச் சட்டத்தின் கீழ் 2,66,070 வழக்குகளை பதிவு செய்துள்ளனர். 3,16,261 வழக்குகள் பதிவு செய்யப்பட்ட 2019 ஆம் ஆண்டை விட 15 சதவீதம் குறைவு ஆகும்.ஒவ்வொரு ஐந்து மணி நேரத்திற்கும் ஒரு பாலியல் வன்கொடுமை, ஒவ்வொரு 19 மணி நேரத்திற்கும் ஒரு கொலை மற்றும் ஒவ்வொரு 15 நிமிடங்களுக்கும் ஒரு கார் திருட்டு நடைபெறுவதாக காவல்துறை தரப்பில் தகவல் தெரிவிக்கப்பட்டுள்ளது.நகரில் கொலை வழக்குகள் 9.40 சதவீதம் குறைந்துள்ளன. 2020 ஆம் ஆண்டில் இதுபோன்ற 472 வழக்குகள் பதிவு செய்யப்பட்டுள்ளன.2019 -ஆம் ஆண்டு 521 வழக்குகள் பதிவு செய்யப்பட்டுள்ளன என்று காவல்துறையினர் தெரிவித்துள்ளனர்.

கடத்தல் வழக்குகள் 26.67 சதவீதமும், கொள்ளை வழக்குகள் 27.33 சதவீதமும், மோட்டார் வாகன திருட்டு வழக்குகள் 24.23 சதவீதமும், பிற திருட்டு வழக்குகள் 30.52 சதவீதமும் குறைந்துவிட்டதாகவும் தெரிவிக்கப்பட்டுள்ளது.கொள்ளை வழக்குகளின் எண்ணிக்கை 0.35 சதவீதம் ஓரளவு உயர்ந்துள்ளதாக டெல்லி காவல்துறை தெரிவித்துள்ளது. 2019-ஆம் ஆண்டில் 1,956 ஆக இருந்த நிலையில், 2020 -ஆம் ஆண்டு மொத்தம் 1,963 வழக்குகள் பதிவு செய்யப்பட்டுள்ளன என்று காவல்துறை தரப்பில் தகவல் தெரிவிக்கப்பட்டுள்ளது.