காங்கிரஸின் அட்டூழியங்களை மக்கள் இனியும் சகித்துக் கொள்ள மாட்டார்கள் என்று முடிவு.! பிரதமர் மோடி பேச்சு..

Modi [Image source : PTI]

இந்த ஆண்டு இறுதியில் ராஜஸ்தான், மத்தியப்பிரதேசம், சத்தீஸ்கர், தெலங்கானா, மிசோரம் ஆகிய ஐந்து மாநிலங்களில் சட்டமன்றத் தேர்தல் நடைபெற உள்ளது. அதனால் தேசிய கட்சிகள் தேர்தலில் வெற்றி பெறுவதற்கான நோக்கில் தீவிரமாக செயல்பட்டு வருகின்றன. அந்தவகையில் சத்தீஸ்கரின் பிலாஸ்பூரில் பாஜகவின் ‘பரிவர்தன் மகா சங்கல்ப் பேரணி’ நடை பெற்றது.

இந்த பேரணியில் பிரதமர் நரேந்திர மோடி உரையாற்றினார். அப்போது அவர் சத்தீஸ்கரில் நடைபெற்று வரும் காங்கிரஸ் அரசாங்கத்தின் மீது கடுமையான தாக்குதலை வெளிப்படுத்தினார். அவர் கூறுகையில் “சத்தீஸ்கரில் மாற்றம் இறுதி செய்யப்பட்டுள்ளது. இங்கு காணப்படும் கூட்டம் மாற்றத்தின் பிரகடனம். காங்கிரஸின் அட்டூழியங்களை சத்தீஸ்கர் மக்கள் இனியும் சகித்துக் கொள்ள மாட்டார்கள் என்று முடிவு செய்துள்ளனர்” என்று கூறினார்.

தொடர்ந்து பேசிய அவர், “உங்கள் கனவுகள் எனது தீர்மானம் என்பதே எனது உத்தரவாதம். இங்கு பாஜக ஆட்சி அமைந்தால்தான் உங்கள் கனவுகள் நனவாகும். டெல்லியில் இருந்து நாம் எத்தனை முயற்சிகளை மேற்கொண்டாலும், அந்த முயற்சிகளை இங்குள்ள காங்கிரஸ் தோல்வியடையச் செய்கிறது. கடந்த ஐந்தாண்டுகளில் சத்தீஸ்கருக்கு இங்கு ஆயிரக்கணக்கான கோடி ரூபாய் கிடைத்தது. சாலைகள், ரயில்கள், மின்சாரம் மற்றும் பல்வேறு வளர்ச்சித் திட்டங்களில் நாங்கள் அரசுக்கு எந்தப் பணப் பற்றாக்குறையையும் வைத்திருக்கவில்லை.” எனக் கூறினார்.

மேலும், “சத்தீஸ்கரில் உள்ள உள்கட்டமைப்பு திட்டங்களுக்கு ஆயிரக்கணக்கான கோடி மதிப்பில் இந்திய அரசு ஒப்புதல் அளித்துள்ளது. அவை நிறுத்தப்படுகின்றன அல்லது தாமதமாகின்றன. காங்கிரஸ் ஆட்சியில் ரூ. ரயில்வேக்கு ரூ.300 கோடி ஒதுக்கீடு செய்யப்பட்டது. ஆனால் இந்த ஆண்டு பா.ஜ.க. ரூ.6,000 கோடி ஒதுக்கீடு செய்தது. இது ‘மோடி மாடல்’, இது சத்தீஸ்கர் மீதான எனது காதல். இது சத்தீஸ்கரின் வளர்ச்சிக்கான எனது அர்ப்பணிப்பு. ரயில் தண்டவாளத்தை விரைவில் மின்மயமாக்க முயற்சித்து வருகிறோம். சத்தீஸ்கருக்கு நவீன வந்தே பாரத் ரயிலைக் கொடுத்தது பாஜகதான்.” என்று பிரதமர் மோடி கூறியுள்ளார்.