கிரிக்கெட் வீரர் ரிஷப் பந்த் தனியார் வார்டுக்கு மாற்றப்பட்டார் – டிடிசிஏ இயக்குனர்

இந்திய கிரிக்கெட் வீரர் ரிஷப் பந்த்  தனி வார்டுக்கு மாற்றப்பட்டுள்ளார்.

இந்திய கிரிக்கெட் வீரர் ரிஷப் பந்த் கடந்த டிச-30ஆம் தேதி அதிகாலை காரில் சென்று கொண்டிருந்த போது நெடுஞ்சாலையில் உள்ள டிவைடரில் கார் மோதி விபத்துக்குள்ளானது. இதில் படுகாயமடைந்த ரிஷப் பந்த் டேராடூனில் உள்ள மருத்துவமனையில் அனுமதிக்கப்பட்டு சிகிச்சை பெற்று வருகிறார்.

இந்திய கிரிக்கெட் கட்டுப்பாட்டு வாரியம் வெள்ளிக்கிழமை வெளியிட்ட அறிக்கையில், “பந்த்திற்கு நெற்றியில் இரண்டு வெட்டுக்கள், வலது முழங்காலில் ஒரு தசைநார் கிழிந்துள்ளது மற்றும் அவரது வலது மணிக்கட்டு, கணுக்கால் மற்றும் கால்விரலில் காயம் மற்றும் சிராய்ப்பு காயங்கள் ஏற்பட்டுள்ளன. ரிஷப்பின் உடல்நிலை சீராக உள்ளது என தெரிவிக்கப்பட்டிருந்தது.

இந்த நிலையில் ரிஷப் பந்தின் காயங்கள் முழுமையாக குணமடைந்து அவர் மீண்டும் இந்திய அணியில் இணைந்து விளையாட ஒரு ஆண்டு ஆகலாம் என்று டாக்டர்கள் தெரிவித்துள்ளனர். மேலும், அவரைச் பலர் சந்திக்க வருவதால்,  நோய்த்தொற்று ஏற்பட வாய்ப்புகள் இருப்பதால் அதைத் தவிர்க்க வேண்டும் என அறிவுறுத்தப்பட்டுள்ளது. 

இதனையடுத்து, டெல்லி மற்றும் மாவட்ட கிரிக்கெட் சங்கத்தின் (டிடிசிஏ) இயக்குனர் ஷியாம் சர்மா, தொற்று பயம் காரணமாக அவரது குடும்பத்தினரிடமும் மருத்துவமனை நிர்வாகத்திடமும் தனி வார்டுக்கு மாற்றுமாறு கூறியிருந்தோம். அதன்படி, அவர் தனி  வார்டுக்கு மாற்றப்பட்டுள்ளார். அவர் நன்றாக இருக்கிறார், விரைவில் குணமடைவார் என தெரிவித்துள்ளார்.