ஆளுநருக்கு எதிரான முதல்வர் ஸ்டாலின் நடவடிக்கை; மம்தா ஆதரவு.!

ஆளுநருக்கு எதிரான தமிழக முதல்வர் ஸ்டாலின் எடுத்த நடவடிக்கைக்கு, மம்தா பானர்ஜி வரவேற்பு தெரிவித்துள்ளார்.

தமிழக முதலமைச்சர் ஸ்டாலின், ஆளுநரின் நடவடிக்கைக்கு எதிராக சட்டப்பேரவையில் தனித்தீர்மானம் கொண்டுவந்து நிறைவேற்றினார். மேலும் பாஜக ஆட்சி செய்யாத மற்ற மாநிலங்களுக்கும், இது போன்று ஆளுநர்களுக்கு மசோதாக்களை ஒப்புதல் வழங்குவதற்கு கால நிர்ணயம் செய்வது தொடர்பாக கடிதம் எழுதியிருந்தார்.

முதலமைச்சர் ஸ்டாலினின் இந்த நடவடிக்கைக்கு மேற்குவங்க முதல்வர் மம்தா பானர்ஜி, வரவேற்பு அளித்திருக்கிறார். இது குறித்து மம்தா பானர்ஜி, ஜனநாயகத்திற்கு விரோதமாக செயல்படும் ஆளுநர்களுக்கு எதிரான, ஸ்டாலினின் முயற்சிக்கு ஆதரவளிப்பதாக கூறினார். முன்னதாக தமிழக சட்டசபையில் நிறைவேற்றப்பட்ட மசோதாக்களுக்கு, ஆளுநர் ஒப்புதல் அளிக்காமல் நீண்டநாட்களாக இழுபறியில் வைத்திருந்தார்.

இதனையடுத்து முதல்வர் ஸ்டாலின், ஆளுநருக்கு எதிராக சட்டசபையில் தனித்தீர்மானம் கொண்டுவந்திருந்தார் என்பது குறிப்பிடத்தக்கது. ஏற்கனவே டெல்லி முதல்வர் அரவிந்த் கெஜ்ரிவால், மற்றும் கேரள முதல்வர் பினராயி விஜயன் முதல்வரின் இந்த கடிதத்திற்கு ஆதரவு தெரிவித்த நிலையில் தற்போது மம்தா பானர்ஜியும் ஆதரவு அளித்துள்ளார்.

மேலும் ஆளுநர்களுக்கு எதிரான அடுத்தகட்ட நடவடிக்கை குறித்து, பாஜக ஆட்சி செய்யாத மற்ற மாநில முதல்வர்கள் ஒன்று சேர்ந்து விவாதிக்கவும் அவர், முதல்வர் ஸ்டாலினை வலியுறுத்தியுள்ளார்.