பிரபல கிரிக்கெட் வீரரும்,பாஜக எம்.பி.யுமான கவுதம் கம்பீருக்கு கொலை மிரட்டல்-பாதுகாப்பு கோரி புகார்

• பாஜகவின் எம்.பி.யாக கவுதம் கம்பீர் உள்ளார்.  
• கவுதம் கம்பீர் மற்றும் அவரது குடும்பத்தினருக்கு கொலை மிரட்டல் விடுக்கப்பட்டுள்ளது. 

நடந்து முடிந்த மக்களவை தேர்தலில்  கிழக்கு டெல்லி பகுதியில் பாஜக சார்பில் இந்திய முன்னாள் கிரிகெட் வீரர் கவுதம் கம்பீர் போட்டியிட்டு வெற்றிபெற்றார்.இதன் பின்னர் எம்.பி.யாக பதவியேற்ற நிலையில் அரசியல் மற்றும் கிரிக்கெட் களம் என இரண்டிலும் கவனம் செலுத்தி வருகிறார்.அரசியல் தொடர்பான கருத்துக்களையும் தெரிவித்து வருகிறார்,கிரிக்கெட்டிலும் வர்ணனையாளராகவும் இருந்து வருகிறார்.

இந்நிலையில்  தனக்கும் தன் குடும்பத்தினருக்கு தொலைபேசியில் மர்மநபர்கள் கொலை மிரட்டல் விடுத்ததாக பாஜக எம்.பியும், கிரிக்கெட் வீரருமான கவுதம் கம்பீர் புகார் அளித்துள்ளார். இது தொடர்பாக ஷாதாரா மாவட்ட துணை ஆணையருக்கு கவுதம் கம்பீர் புகார்  தொடர்பாக கடிதம் அனுப்பியுள்ளார்.அந்த கடிதத்தில் தனக்கும் தனது குடும்பத்தினருக்கும்சர்வதேச எண்ணிலிருந்து கொலை மிரட்டல் விடுக்கப்படுவதாக புகார் தெரிவித்துள்ளார்.எனவே  தனக்கும் தனது குடும்பத்தினருக்கும் பாதுகாப்பு அளிக்க வேண்டும் என்று கோரிக்கை விடுத்துள்ளார்.