Assembly Elections 2023: காங்கிரஸ் வேட்பாளர்களின் முதல் பட்டியல் வெளியானது..!

சத்தீஸ்கரில் 30 வேட்பாளர்களின் பெயர்கள் அடங்கிய  முதல் பட்டியலை காங்கிரஸ் இன்று வெளியிட்டுள்ளது.

சத்தீஸ்கர் மாநிலத்தில் நவம்பர் 7 மற்றும் 17 ஆகிய தேதிகளில் இரண்டு கட்டங்களாக சட்டமன்றத் தேர்தல் நடத்தப்பட்டு டிசம்பர் 3 ஆம் தேதி முடிவுகள் அறிவிக்கப்படவுள்ளது. மாநிலத்தில் மொத்தம் 90 சட்டசபை தொகுதிகள் உள்ளன. இங்கு பெரும்பான்மைக்கு 46 இடங்கள் தேவைப்படுகிறது. ஞாயிற்றுக்கிழமை அதாவது இன்று வேட்பாளர் பட்டியலை காங்கிரஸ் கட்சி வெளியிடும் என்று  முதல்வர் பூபேஷ் பாகேல் தெரிவித்திருந்தார்.

முதல் பட்டியலில் 40-க்கும் மேற்பட்ட பெயர்கள் வெளியிடப்படலாம் என்று எதிர்பார்க்கப்பட்ட நிலையில்  இன்று வெளியிடப்பட்ட பட்டியலில் 30 பெயர்கள் மட்டுமே இருந்தன. இந்த தேர்தலில் சத்தீஸ்கரில் ஆளும் காங்கிரஸ் கட்சி ஆட்சியைத் தக்க வைக்க போராடுகிறது. முதல்வர் பூபேஷ் பாகேல் பதான் சட்டசபை தொகுதியில் தேர்தலில் போட்டியிடுகிறார். பட்டியலில் இடம்பெற்றுள்ள துணை முதல்வர் டி.எஸ். சிங்தேவ் அம்பிகாபூர் சட்டமன்றத் தொகுதியில் தேர்தலில் போட்டியிடுகிறார்.

சித்ரகோட் சட்டமன்றத் தொகுதியில் காங்கிரஸ் கட்சியின் மாநிலத் தலைவரும் எம்பியுமான தீபக் பைஜ் அக்கட்சியின் வேட்பாளராக நிறுத்தப்படுகிறார். 7 புதிய முகங்களுக்கு வாய்ப்பு கிடைத்துள்ள நிலையில், 6 எம்எல்ஏக்களுக்கு வாய்ப்பு மறுக்கப்பட்டுள்ளது. தண்டேவாடாவில் இருந்து தேவாதி கர்மாவின் வாய்ப்பு மறுக்கப்பட்டு அவரது மகன் சவீந்திர மகேந்திர கர்மாவுக்கு வாய்ப்பு அளிக்கப்பட்டுள்ளது. எம்எல்ஏ குருதயாள் சிங் பஞ்சாரேவின் வாய்ப்பு மறுக்கப்பட்டு அமைச்சர் குருருத்ரா வேட்பாளராக்கப்பட்டுள்ளார்.

டோங்கர்கர் தொகுதியில் இருந்து புனேஷ்வர் சிங்கிற்கு  வாய்ப்பு மறுக்கப்பட்டு ஹர்ஷிதா ஸ்வாமி பாகேல் வேட்பாளராக நிறுத்தப்பட்டுள்ளார். குஜ்ஜியிடம் இருந்து போலாரம் சாஹு சீட்டு பெற்றதால், அங்கிருந்து தற்போதைய எம்எல்ஏ சானி சாஹுவின் வாய்ப்பு மறுக்கப்பட்டுள்ளது.