அருணாச்சல பிரதேசத்தில் ராணுவ ஹெலிகாப்டர் விபத்து..! 2 விமானிகள் உயிரிழப்பு..!

அருணாச்சல பிரதேசத்தில் இந்திய ராணுவ சீட்டா ஹெலிகாப்டர் விபத்தில் சிக்கிய இரு விமானிகளும் உயிரிழந்தனர். 

அருணாச்சலப் பிரதேசத்தில் மண்டாலா மலைப்பகுதியில் இந்திய ராணுவ ஹெலிகாப்டர் சீட்டா (Cheetah) விபத்துக்குள்ளானது. இந்த விபத்தில் ஹெலிகாப்டரில் இருந்த இரண்டு விமானிகளும் உயிரிழந்துள்ளதாக ராணுவ அதிகாரிகள் தெரிவித்துள்ளனர்.

இன்று காலை 9:15 மணியளவில் அருணாச்சலப் பிரதேசத்தின் செங்கே கிராமத்தில் இருந்து மிஸ்ஸமாரிக்கு சென்று கொண்டிருந்த போது ராணுவ ஹெலிகாப்டர் பொம்திலா என்ற பகுதியில் விமான போக்குவரத்து கட்டுப்பாட்டுடனான தகவல் தொடர்பை இழந்துள்ளது. பின்னர் மண்டாலா மலைப்பகுதியில் இந்திய ராணுவ ஹெலிகாப்டர் சீட்டா விபத்தில் சிக்கியுள்ளது.

இந்த விபத்தில் சிக்கிய ஹெலிகாப்டரில் இரண்டு விமானிகள் பயணம் செய்துள்ளனர். விமானிகள் உடனான தகவல் இணைப்பு துண்டிக்கப்பட்ட நிலையில் இராணுவம், காவல்துறையின் தேடல் மற்றும் மீட்புக் குழுக்கள் சம்பவ இடத்திற்குச் சென்று விமானிகளைத் தேடும் பணியில் ஈடுபட்டனர்.

சில மணிநேர தேடலுக்கு பிறகு விபத்தில் சிக்கிய இரு விமானிகளும் உயிரிழந்துள்ளதாக ராணுவ அதிகாரிகள் தெரிவித்துள்ளனர். ஹெலிகாப்டரின் பாகங்கள் மண்டலா கிழக்கே பங்களாஜாப் கிராமத்திற்கு அருகில் கண்டுபிடிக்கப்பட்டுள்ளது.