பிசிசிஐ விருது பெற மனைவியுடன் வந்த விராட் கோலி.! ரசிகர்கள் ஆரவாரம்..!

by Dinasuvadu deskPosted on June 13, 2018

பெங்களூரு:

பெங்களூருவில் கிரிக்கெட் வீரர், வீராங்கனைகளுக்கான விருது வழங்கும் விழா நேற்று நடைபெற்றது. இந்த விழாவில் இந்திய கிரிக்கெட் ஆண்கள், பெண்கள் அணிகள் மற்றும் உள்ளூர் அணிக்காக விளையாடிய வீரர்கள் என பலர் கலந்துகொண்டனர். இந்த விழாவில் சர்வதேச போட்டி, உள்ளூர் போட்டிகளில் மிக சிறப்பாக செயல்பட்ட வீரர், வீராங்கனைகளுக்கு விருது வழங்கப்பட்டது.

2016-17, 2017-18 ஆகிய இரண்டு சீசன்களில் இந்திய ஆண்கள், பெண்கள் கிரிக்கெட் அணிகள் தொடர்ச்சியாக மிக சிறப்பாக விளையாடியுள்ளன. இந்திய ஆண்கள் அணி பல தொடர்களை வென்றது. அதே போல பெண்கள் கிரிக்கெட் அணி உலககோப்பை கிரிக்கெட் இறுதிப் போட்டிக்கு முன்னேறியது.

இந்த இரு சீசன்களில் மிக சிறப்பாக செயல்பட்ட வீரராக விராட் கோலி அறிவிக்கப்பட்டுள்ளார். அதே போல் பெண்கள் அணியில் ஹர்மன்பிரீத் கவுர் மற்றும் ஸ்மிரிதி மந்தனா ஆகியோர் சர்வதேச அளவில் சிறந்த வீராங்கனைகள் என்ற விருதை முதன்முறையாக பெற்றனர்.

அதே போல் இந்திய கிரிக்கெட்டை மிக உயரத்திற்கு கொண்டு சென்ற ஜெக்மோகன் டால்மியா பெயரிட்டு 4 விருதுகள் வழங்கப்பட்டன. அதில் அதிக ரன் எடுத்த வீரர், விக்கெட் எடுத்த வீரர், U-16 விஜய் மெர்சண்ட் கோப்பையில் சிறப்பாக செயல்பட்ட ஆண் மற்றும் பெண் வீரருக்கான விருது வழங்கப்பட்டன.

அதே போல் பெங்கால் கிரிக்கெட் சங்கம் சார்பாக 2016-17 சீசனில் உள்ளூர் கிரிக்கெட் போட்டியில் சிறப்பாக விளையாடிய வீரருக்கு விருது வழங்கப்பட்டது. மேலும் பிசிசிஐ சார்பாக வழங்கப்படும் விருதுக்கான பண பரிசுத் தொகை ரூ.1 லட்சத்திலிருந்து ரூ.1.5 லட்சமாக உயர்த்தப்பட்டுள்ளது.

இந்த விழாவில் இந்திய கிரிக்கெட் அணியின் கேப்டன் விராட் கோலி மனைவி அனுஷ்கா சர்மாவுடன் கலந்துகொண்டார். தினேஷ் கார்த்திக் தனது மனைவி தீபிகா பல்லிகல் உடன் கலந்துகொண்டார். மேலும் இந்தியாவுக்கு எதிராக டெஸ்ட் போட்டியில் விளையாட வந்துள்ள ஆப்கானிஸ்தான் அணி வீரர்களும் இந்த விழாவில் கலந்துகொண்டனர்.