காவிரி மேலாண்மை ஆணையத்துக்கான உறுப்பினர் பட்டியல் 3 நாட்களில் அளிக்கப்படும் : குமாரசாமி..!

காவிரி நதிநீர் பங்கீடு விவகாரத்தில் காவிரி மேலாண்மை வாரியம் அமைக்க வேண்டும் என மத்திய அரசுக்கு உச்சநீதிமன்றம் உத்தரவை பிறப்பித்தது. இதையடுத்து கர்நாடக மாநில தேர்தல் முடிவடைந்த உடன் மேலாண்மை ஆணையம் குறித்த ஆவணங்களை மத்திய அரசு உச்சநீதிமன்றத்தில் சமர்ப்பித்தது.

இதில் மாநில அரசுகளின் சில கோரிக்கைகளின் அடிப்படையில் சில மாற்றங்கள் செய்யப்பட்டு, மேலாண்மை ஆணையம் என அறிவிக்கப்பட்டு, அரசிதழிலும் வெளியிடப்பட்டது.

இந்த மேலாண்மை ஆணையத்தில் மாநிலங்களைச் சேர்ந்த உறுப்பினர்களும் இடம் பெறுவார்கள் என்பதன் அடிப்படையில் 4 மாநில உறுப்பினர்களின் பெயர் பட்டியலை வழங்க வேண்டும் என மத்திய நீர்வளத்துறை 4 மாநிலங்களுக்கும் நோட்டீஸ் அனுப்பியது.

அதன் அடிப்படையில் தமிழகம், கேரளா, பாண்டிச்சேரி ஆகிய 3 மாநில உறுப்பினர் பெயர் பட்டியல் குறித்த நேரத்தில் சமர்ப்பிக்கப்பட்டது. கர்நாடகா மட்டும் உறுப்பினர் பட்டியலை வழங்காமல் காலம் தாழ்த்தி வந்தது.

இதையடுத்து காவிரி மேலாண்மை ஆணையம் தொடர்பாக நேற்று மத்திய நீர்வளத்துறை மந்திரி நிதின் கட்கரியை கர்நாடக முதல்மந்திரி குமாரசாமி நேரில் சந்தித்து பேசினார். அதில் காவிரி மேலாண்மை ஆணையத்தில் சில குறைபாடுகள் இருப்பதாகவும் அதனை சரி செய்தால் ஏற்றுக்கொள்ள தயார் எனவும் தெரிவித்திருந்தார்.

மேலும், உரிய நேரத்தில் காவிரி மேலாண்மை ஆணையத்துக்கான உறுப்பினர் பட்டியலை அறிவிப்போம் எனவும் தெரிவித்திருந்தார்.

அதன்படி, காவிரி மேலாண்மை ஆணையத்துக்கான உறுப்பினர்களின் பெயர் பட்டியல் இன்னும் 3 நாட்களில் பரிந்துரை செய்யப்படும் என இன்று குமாரசாமி அறிவித்துள்ளார்.