கடுமையான குடிநீர் தட்டுப்பாடு நிலவுகிறது உத்தரப்பிரதேசத்தில்..!
6 கி.மீ தூரம் நடந்து சென்று, குடிநீர் எடுக்கும் அவலநிலை கிராமப் பகுதிகளில் நீடிக்கிறது.
உத்தரப்பிரதேச மாநிலம் பந்தெல்கந்த் பகுதி மக்கள், தங்கள் குடும்பத்தினர் தேவைக்கு குடிநீர் எடுக்க பல மணி நேரங்கள் நடந்து செல்ல வேண்டியுள்ளது. ’வாட்டர் எய்ட்'(WaterAid) என்ற தன்னார்வ தொண்டு நிறுவனம், வறட்சி குறித்து ஆய்வு நடத்தியது. அதில், பந்தெல்கந்த் பகுதி பெண்கள், குடிநீர் தேவையைப் பூர்த்தி செய்ய குறைந்தபட்சம் 3 கி.மீ வரை செல்ல வேண்டியுள்ளதாக தெரியவந்துள்ளது.
மஹோபா, பந்தா, சித்ரகோட் ஆகிய பகுதிகளில் வறட்சியின் நீட்டிப்பு என்ற பெயரில் அறிக்கை ஒன்று உருவாக்கப்பட்டுள்ளது. அதன்படி, வழக்கமாக குடிநீர் எடுக்க பெண்கள் 3 கி.மீ தூரம் கிராமத்தை விட்டு வெளியே செல்கின்றனர். குறிப்பாக எஸ்.சி பிரிவினர் கடுமையாக பாதிக்கப்பட்டுள்ளனர். தலித் பகுதியினருக்கு குடிநீர் இருப்பு மிக மோசமான நிலையில் உள்ளது.
இதுதொடர்பான ஆய்வு 9 பாதிக்கப்பட்ட பகுதிகளில் உள்ள 65 கிராம பஞ்சாயத்துகளைச் சேர்ந்த 82 வருவாய் கிராமங்களில் நடத்தப்பட்டது. வறட்சியின் காரணமாக உணவு தட்டுப்பாடு ஏற்படும் சூழல் உருவாகியுள்ளது. தண்ணீர் இல்லாததால், 80% விளை நிலங்களில் வெற்றிடமாக காட்சியளிக்கிறது. உணவு தானியங்களின் உற்பத்திக் குறைவால், விலங்குகளின் உணவுத் தேவையும் பாதித்துள்ளது.
