கிராமத்து ஸ்டைலில் இறால் தொக்கு செய்வது எப்படி? வாங்க தெரிஞ்சுக்கலாம்..!

Chennai -கடல் உணவுகளில் ஒன்றானது தான் இறால். இதை எப்படி செய்து கொடுத்தாலும் விரும்பி சாப்பிடும் இறால் பிரியர்கள் ஏராளம் .இறாலில் அதிக அளவு வைட்டமின் டி சத்தும், புரதச்சத்தும் நிறைந்துள்ளது. இதில் கார்போஹைட்ரேட் இல்லை என்பதால் உடல் எடை குறைக்க நினைப்பவர்கள் இந்த அசைவ உணவை தேர்வு செய்யலாம்.

கிராமத்து ஸ்டைலில் இறால் செய்யும் முறை;

மசாலா அரைக்க தேவையான பொருட்கள்;

• இறால் =அரை கிலோ
• இஞ்சி= ஒரு துண்டு
• பூண்டு =15 பள்ளு
• சின்ன வெங்காயம் =ஐந்து
• மிளகு ஒரு ஸ்பூன்
• சீரகம் =அரை ஸ்பூன்
• சோம்பு= ஒரு  ஸ்பூன்

தாளிக்க தேவையானவை ;

• எண்ணெய் = நான்கு ஸ்பூன்
• பெரிய வெங்காயம்= 2
• தக்காளி= 2
• பச்சை மிளகாய்= 2

மசாலா பொடிகள் ;

• மல்லித்தூள் =ஒரு ஸ்பூன்
• மிளகாய்த்தூள்= ஒரு ஸ்பூன்
• மஞ்சள் தூள்= 1/2 ஸ்பூன்
• கொத்தமல்லி இலைகள்=சிறிதளவு

செய்முறை;

முதலில் இறாலை சுத்தம் செய்து எடுத்து வைத்துக் கொள்ளவும். இப்பொழுது மிக்ஸி ஜாரில் இஞ்சி, பூண்டு, சின்ன வெங்காயம் ,மிளகு, சீரகம் மற்றும் அரை ஸ்பூன் சோம்பை சிறிதளவு தண்ணீர் ஊற்றி நைசாக அரைத்துக் கொள்ளவும். பிறகு ஒரு பாத்திரத்தில் நான்கு ஸ்பூன் எண்ணெய் ஊற்றி அதில் அரை ஸ்பூன் சோம்பு சேர்த்து பொரிந்ததும் பெரிய வெங்காயம் மற்றும் கருவேப்பிலை சேர்த்து பொன்னிறமாக வதக்கவும். இப்பொழுது அரைத்து வைத்துள்ள மசாலாவையும் சேர்த்து கலந்து கொள்ளவும்.

அதன் பச்சை வாசனை போன பிறகு தக்காளி மற்றும் பச்சை மிளகாயை சேர்த்து நன்கு வதக்கி விடவும். தக்காளி வதங்கியதும் மசாலா பொடிகளை சேர்த்து கிளறிவிட்டு அதிலே இறாலையும் சேர்த்து கலந்து விடவும். இறால் மூழ்கும் அளவு தண்ணீர்  ஊற்றி  உப்பும் சேர்த்து இறாலை வேக வைக்கவும். இறால் வெந்த பிறகு கலந்துவிட்டு தண்ணீர் வற்றி எண்ணெய்   பிரிந்து வரும் சமயத்தில் கொத்தமல்லி இலைகளை தூவி இறக்கினால் நாவூரும்  சுவையில் இறால் தொக்கு ரெடி..