சிறுநீரக பிரச்சனைக்கு முற்றுப்புள்ளி வைப்போம்….!!!!

இன்றைய காலகட்டத்தில் அதிகமானோர் சிறுநீரக பிரச்சனையால் பாதிக்கபடுகின்றனர். மனிதனின் உடல் நலத்தை பிரதிபலிக்கும் உறுப்புகளில் சிறுநீரகமும் ஒன்று. இந்த பாதிப்புக்கு “வருமுன் காப்பதே சிறந்தது” என சிறுநீரகவியல் மருத்துவர்கள் கூறுகின்றனர்.

சிறுநீரகம் செயலிழத்தலின் வகைகள் :

சிறுநீரக செயல் இழப்பு என்பதைத் தற்காலிகமாக சிறுநீரகம் செயல் இழத்தல், நிரந்தரமாக சிறுநீரகம் செயல் இழத்தல் என இரண்டு வகையாகப் பிரித்து கொள்ளலாம். இந்த சிறுநீரக பாதிப்பு சிறு வயதினர் முதல் பெரியவர்கள் வரை பாதிக்கிறது.

தற்காலிகமாக சிறுநீரகம் செயல் இழத்தல் :

சிறுநீரகங்களில் உண்டாகும் உயர் ரத்த அழுத்தம், சிறுநீரக அழற்சி, சிறுநீர் பாதையில் கற்கள் உருவாதல் போன்றவை தற்காலிகமாக சிறுநீரகம் செயல் இழத்தல் வகையில் இடம் பெறும். சிறுநீரகங்கள் தற்காலிகமாக செயல் இழக்கும்போது, பலவிதமான ஒவ்வாமை, வயிற்றுப்போக்கு, சீதபேதி, வாந்தி, கருவுற்ற பெண்களுக்கு அதிகளவில் ரத்தம் வெளியேறுதல், எலி காய்ச்சல், மலேரியா போன்ற நோய்கள் உட்பட ஏராளமான பிரச்சனைகள் தோன்றும்.

நிரந்தரமாக சிறுநீரகம் செயல் இழத்தல் :

சர்க்கரை நோய், பல நாட்களாக சிறுநீரில் புரதச்சத்து வெளியேறுதல் போன்றவைதான் சிறுநீரகங்கள் நிரந்தரமாக செயல்படாமல் போவதற்கு முக்கிய காரணமாக இருக்கிறது.

சிறுநீரகத்தின் வேலை :

நமது உடலில் உள்ள நீர்ச்சத்தில் காணப்படுகிற தேவையற்ற கழிவுகளை வெளியேற்றும் வேலையைச்  செய்வது சிறுநீரகம் தான். இது பழுது அடைய தொடங்கும்போது, அளவுக்கு அதிகமாக சிறுநீர் வெளியேறும் அல்லது தேவையான அளவிற்கு வெளியேறாமல் Urinary Blader-ல் தங்கிவிடும். ஒரு சிலர் கட்டுப்படுத்த முடியாமல் அடிக்கடி சிறுநீர் கழிப்பார்கள். சிறுவர், சிறுமியராக இருந்தால், தூங்கும் நேரங்களில் படுக்கையை நனைத்து விடுவார்கள். மேலும் சிறுநீரக பாதிப்பால் பல பிரச்சனைகள் ஏற்பட கூடும்.

மருத்துவ ஆலோசனை :

திடகாத்திரமான உடல்நலம் கொண்டு இருந்தாலும் வருடம் ஒரு முறை சிறுநீரக மருத்துவரின் ஆலோசனைப்படி பரிசோதனை செய்துகொள்ள வேண்டும். அல்ட்ரா சவுண்ட் ஸ்கேன் செய்வதன் மூலமாக சிறுநீரகம் சிறிதாக உள்ளதா, பெரிதாக வீங்கி உள்ளதா என்பதை அறிந்துகொள்ளலாம்.

சிறுநீரகம் செயல் இழப்பைக் குணப்படுத்தவும், அதனால் ஏற்படுகிற மற்ற பாதிப்புக்களை சரி செய்யவும் தற்போது நவீன சிகிச்சைகள் நிறைய உள்ளன. நோயாளியின் உடல்நலத்தைப் பொறுத்தும், நோயின் தீவிரத்தைப் பொறுத்தும் சிகிச்சைகள் அமைகின்றது. சிறுநீர்த்தொற்று இருந்தால் ஆன்டிபயாட்டிக் கொடுத்து நுண்கிருமிகளை அழிக்க முடியும் என மருத்துவர்கள் தெரிவிக்கின்றனர்.