கம்பேக் இப்படி இருக்கனும்! வசூலில் மாஸ் காட்டும் குட் பேட் அக்லி!

சென்னை : கம்பேக் என்றால் இப்படி இருக்கவேண்டும் என தமிழ் சினிமாவில் அஜித் குட் பேட் அக்லி திரைப்படத்தில் நடித்ததன் மூலம்  மாஸான கம்பேக் கொடுத்துள்ளார். இந்த திரைப்படத்திற்கு முன்னதாக அவர் மகிழ் திருமேனி இயக்கத்தில் உருவான விடாமுயற்சி திரைப்படத்தில் நடித்திருந்தார். இந்த திரைப்படம் வெளியாகி எதிர்பார்த்த அளவுக்கு வசூல் ரீதியாகவும், விமர்சன ரீதியாகவும் வரவேற்பை பெறவில்லை என்பதால் அஜித் ரசிகர்கள் மனம் வாடிவிட்டனர்.

வசூல் ரீதியாகவும் விடாமுயற்சி படம் 200 கோடி கூட வசூல் செய்யாமல் தோல்வியை தழுவியது. எனவே, ரசிகர்கள் அனைவரும் குட் பேட் அக்லி சம்பவம் செய்யும் என இந்த படத்திற்காக ஆவலுடன் காத்திருந்தார்கள். எனவே, பெரிய எதிர்பார்ப்புகளுக்கு மத்தியில் கடந்த ஏப்ரல் 10-ஆம் தேதி திரையரங்குகளில் தமிழ், தெலுங்கு, கன்னடம் ஆகிய மொழிகளில் வெளியானது. படமும் ரசிகர்களுக்காகவே எடுக்கப்பட்டது போல இருந்த காரணத்தால் கொண்டாடி தீர்த்து வருகிறார்கள்.

பெரிய அளவில் எதிர்மறையான விமர்சனங்கள் இந்த படத்திற்கு வரவில்லை என்பதால் அமோகமாக வசூல் ரீதியாக வரவேற்பு கிடைத்து வருகிறது. படம் வெளியான முதல் நாளிலே உலகம் முழுவதும் 50 கோடிகளுக்கு மேல் வசூல் செய்திருந்ததாகவும், தமிழகத்தில் மட்டும் 31 கோடி வசூல் செய்திருந்ததாகவும் அறிவிக்கப்பட்டிருந்தது. அதற்கு அடுத்த நாளிலும் படத்திற்கு வரவேற்பு அமோகமாக இருந்த காரணத்தாலும், வெளியான 2 நாட்களில் உலகம் முழுவதும் 100 கோடிகளை தாண்டியிருந்தது.

அதனை தொடர்ந்து படம் வெளியாகி 3 நாட்களில் எவ்வளவு கோடி வசூல் செய்துள்ளது என்பதற்கான தகவலும் கிடைத்துள்ளது. அதன்படி. படம் வெளியான 3 நாட்களில் 150 கோடிகள் வரை வசூல் செய்துள்ளதாகவும், இன்று 4-வது நாளாக பலத்த வரவேற்பை பெற்று வருவதால் இன்று அல்லது நாளை உலகம் முழுவதும் 200 கோடி வசூலை கடந்துவிடும் எனவும் எதிர்பார்க்கப்படுகிறது. படம் எடுக்கப்பட்ட தொகை 250 கோடி இன்னும் சில நாட்களில் போட்ட பணத்தை வசூலில் எடுத்துவிடும் எனவும் எதிர்பார்க்கப்படுகிறது.