அமரன் வெற்றி! தனுஷுக்கு ஸ்கெட்ச் போட்ட இயக்குநர் ராஜ்குமார் பெரியசாமி!

சென்னை : பொதுவாகவே ஒரு இயக்குநர் ஒரு படத்தினை இயக்கிய பெரிய அளவில் ஹிட் கொடுத்துவிட்டார் என்றாலே அந்த இயக்குநர் எந்த ஹீரோவை வைத்து தனது அடுத்த படத்தினை இயக்குவார் என்ற எதிர்பார்ப்பு மக்களுக்கு மத்தியில் எழுந்துவிடும். அப்படி தான் தற்போது, அமரன் எனும் தரமான படத்தினை கொடுத்த இயக்குநர் ராஜ்குமார் பெரியசாமி அடுத்ததாக எந்த படத்தினை இயக்கப்போகிறார் என்ற எதிர்பார்ப்பு எழுந்துள்ளது.

இவர் அமரன் படத்திற்கு முன்பே ரங்கூன் எனும் படத்தினை இயக்கி தான் ஒரு தரமான இயக்குநர் என்பதைக் காட்டிருந்தார். அந்த சமயம், இந்த படத்திற்கு ப்ரோமோஷன் சரியாக இல்லாத காரணத்தால் பெரிய அளவில் மக்களுக்குப் படம் வந்தது தெரியவில்லை. அது அனைத்தையும் அமரன் படத்தின் மூலம் மறக்கடிக்கச் செய்து தமிழ் திரைத்துறையில் வாண்டடான இயக்குநர் பட்டியலிலும் இடம்பிடித்துவிட்டார்.

எனவே, அவர் அமரன் படத்திற்குப் பிறகு எந்த மாதிரியான ஒரு படைப்பைக் கொடுக்கப்போகிறார்? யாரை வைத்து படம் இயக்கப்போகிறார்? என எதிர்பார்ப்பு எழுந்த நிலையில், அடுத்ததாக அவர் நடிப்புக்குப் பெயர்போன தனுஷை வைத்து ஒரு படத்தினை இயக்கவுள்ளதாகத் தகவல்கள் வெளியாகியுள்ளது. அமரன் படத்திற்கு முன்பு வரை தனுஷை வைத்து அவர் படம் இயக்கவுள்ளதற்கான பேச்சுவார்த்தை நடைபெற்று வருவதாகவும் இப்போது அது முடிவடைந்துள்ளதாகவும் கூறப்படுகிறது.

இந்த தகவல் குறித்து அதிகாரப்பூர்வ அறிவிப்பு இன்னும் வெளியாகவில்லை. ஆனால், அமரன் வெற்றிபெற்றதைத் தொடர்ந்து சமீபத்தில் யூடியூப் சேனலுக்கு பேட்டி கொடுப்பதற்காகக் கலந்த கொண்ட இயக்குநர் ராஜ்குமார் பெரியசாமி தன்னுடைய அடுத்த படம் எந்த கதாபாத்திரங்கள் கொடுத்தாலும் நடிப்பில் கலக்கக் கூடிய ஒரு ஹீரோ கூடத் தான் நடக்கப்போகிறது.

இந்த படத்திற்கான பேச்சுவார்த்தை நீண்ட நாட்களாகப் போய்க்கொண்டு இருக்கிறது. கிட்டத்தட்ட அவருடன் என்னுடைய அடுத்தபடம் உறுதியாகிவிட்டது” எனச் சூசகமாகத் தெரிவித்து இருந்தார். எனவே, நம்பத் தக்க சினிமா வட்டாரத்திலிருந்து கிடைத்த தகவலின் படி, அவர் அடுத்ததாக தனுஷை வைத்து படம் இயக்குவது தெரிய வந்துள்ளது. விரைவில் இதற்கான அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது.