20 வருட ஓயா போராட்டம்.. ரூ.50 கோடி மதிப்புள்ள நிலத்தை மீட்ட கவுண்டமணி.!

சென்னை : சென்னை ஆற்காடு சாலையில், தனக்கு உரிய ரூ.50 கோடி மதிப்பிலான நிலத்தை, 20 ஆண்டுகள் சட்டப் போராட்டம் நடத்தி நடிகர் கவுண்டமணி மீட்டுள்ளார்.

1996-ல் நளினி பாய் என்பவரிடம் இருந்து கோடம்பாக்கத்தில் ஆற்காடு சாலையில் ஐந்து மைதானங்கள் மற்றும் 454 சதுர அடி நிலம் வாங்கப்பட்டு, 3.58 கோடி ரூபாய் மதிப்பில் கட்டுமானப் பணிக்கான ஒப்பந்தம் கையெழுத்தானது.

திடீரென வணிக வளாகம் கட்ட ஒப்பந்தம் செய்த தனியார் நிறுவனம், காலக்கெடு முடிவதற்குள் அதிக பணத்தை கொடுத்து, அந்த இடத்தை கையகப்படுத்த முயன்றது.

இதையடுத்து, கவுண்டமணி மற்றும் அவரது குடும்பத்தினர் 2006ல் உயர் நீதிமன்றத்தில், கட்டுமான நிறுவனம் மற்றும் அவர்களது ஆட்களுக்கு எதிராக நிரந்தரத் தடை விதிக்கக் கோரியும், உடைமை மற்றும் சேதங்களை மீட்டுத் தரக் கோரி மற்றொரு வழக்கும் தொடர்ந்தனர்.

இப்படி வருடங்கள் உருண்டோடி, 2019 இல் இந்த வழக்கு தொடர்பாக ஒரு தனி நீதிபதியின் உத்தரவின் படி, நடிகருக்கு ஆதரவாக தீர்ப்பு வழங்கினார். இந்த உத்தரவை எதிர்த்து, கட்டுமான நிறுவனம் மேல்முறையீடு செய்தது.

நீதிபதிகள் ஆர்.சுப்ரமணியன் மற்றும் ஆர்.சக்திவேல் ஆகியோர் அடங்கிய டிவிஷன் பெஞ்ச், மேல்முறையீட்டு மனுவை நிராகரித்தது. இப்படி, 20 வருட ஓயாத போராட்டத்திற்கு பின், உச்ச நீதிமன்றம் வரை கவுண்டமணிக்கு சாதகமாக தீர்ப்பு வர, ஆக்கிரமிப்பாளர்கள் அங்கிருந்து தற்போது வெளியேற்றப்பட்டு சாவியை கவுண்டமணியிடம் ஒப்படைக்கப்பட்டது.