“விசிக மீது காழ்ப்புணர்வால் வன்மம் கக்குவோரை கடந்து செல்வோம்” – தொண்டர்களுக்கு திருமாவளவன் கடிதம்!

சென்னை : திட்டமிட்ட பொய்யுரைகளாகவும் ஆதாரமற்ற அவதூறுகளாகவுமே அள்ளி இறைக்கப்படுகின்றன என்று விசிக தலைவர் திருமாவளவன் தனது சமூக வலைதளப்பக்கத்தில் இரண்டு பக்க அறிக்கையை வெளிட்டுள்ளார்.

இது தொடர்பான அறிக்கையில், “கடந்த முப்பத்தைந்து ஆண்டுகளாகவே நமது களப்பணிகள் மற்றும் வளர்ச்சி நிலைகளுக்கேற்ப, நமக்கு எதிரானவர்கள் விமர்சனங்கள் என்னும் பெயரால் மிகவும் அப்பட்டமான அவதூறுகளைத் தொடர்ந்து பரப்பி வருகின்றனர்.

நம்மை வீழ்த்துவதற்கு கையாண்டுவரும் உத்திகளில் முதன்மையானது அவதூறு பரப்புவது ஆக்கப்பூர்வமான விமர்சனங்களில் தேவையான மாற்றங்களை ஏற்று கொள்கிறோம். நம்மை விமர்சிப்பவர்களில் இருவகை உண்டு.

நம் மீது நம்பிக்கையும், நமது வளர்ச்சியில் அக்கறையும் கொண்டவர்கள் ஒருவகை நம்மை ஏற்க மனமில்லாத நம் வளர்ச்சியை முற்றிலும் விரும்பாத நம்மை வீழ்த்தி மகிழ்ந்தாட காத்திருக்கும் சதிகாரர்கள் இன்னொரு வகை.

ஆனால், எதிலும் உறுதியில்லா உதிரிகளா நமது எதிரிகள்? ஆதாரம் ஏதுமின்றி இவர்கள் பரப்பும் அவதூறுகளா நம்மை அசைக்கும் ஆயுதங்கள் ? காழ்ப்புணர்வால் வன்மம் கக்குவோரைக் கண்டும் காணாமல் கடந்து செல்வோம்” என்று தனது பதிவில் குறிப்பிட்டுள்ளார்.