மாரடைப்பால் உயிரிழந்த இளம் கிரிக்கெட் வீரர்..!

கர்நாடகா கிரிக்கெட் வீரர் ஹொய்சாலா போட்டிமுடிந்த பிறகு மாரடைப்பால் உயிரிழந்தார்.

நேற்று முன்தினம் பெங்களூருவில் உள்ள ஆர்எஸ்ஐ மைதானத்தில் நடைபெற்ற ஏஜிஸ் தென் மண்டல போட்டியில் தமிழக அணிக்கு எதிரான ஆட்டத்தில் கர்நாடகா கிரிக்கெட் வீரர் ஹொய்சாலா விளையாடினார். பரபரப்பாக நடைபெற்ற இந்த போட்டியில் கர்நாடக அணி வெற்றி பெற்றது. போட்டி முடிந்தவுடன் வீரர்களுடன் இரவு உணவு உண்பதற்காக சென்றபோது  திடீரென்று நெஞ்சு வலிக்க ஆரம்பித்து திடீரென ஹொய்சலா மயங்கி கீழே சரிந்து விழுந்தார்.

மைதானத்தில் இருந்த மருத்துவ ஊழியர்கள் உடனடியாக பரிசோதனை செய்து அவசர சிகிச்சை அளித்துள்ளனர். பின்னர்  உடனடியாக ஆம்புலன்ஸ் மூலம்  மருத்துவமனையில் ஹொய்சலா அனுமதிக்கப்பட்டார். ஆனால் ஹொய்சலாவை பரிசோதித்த  மருத்துவர்கள் மருத்துவமனைக்கு வருவதற்கு முன்பே அவர் இறந்துவிட்டதாக தெரிவித்தனர்.

ஹொய்சலா மாரடைப்பால் உயிரிழந்த சம்பவம் அவரது குடும்பத்தினர் மற்றும் கிரிக்கெட் வீரர்கள் மத்தியில் பெரும் சோகத்தை ஏற்படுத்தி உள்ளது. ஹொய்சலா கர்நாடக பிரீமியர் லீக்கில்  ஷிமோகா மற்றும் பெல்லாரி டஸ்கர்ஸ் அணிக்காக  விளையாடி உள்ளார். கர்நாடக ஜூனியர் அணிக்காகவும் விளையாடியுள்ளதாக கூறப்படுகிறது.