சென்னைக்கு புதுவரவு… பொங்கலுக்கு திறக்கப்படும் கலைஞர் பேருந்து முனையம்.! முதல்வர் திறப்பு…

சென்னை முக்கிய பேருந்து நிலையமாக கோயம்பேடு பேருந்து நிலையம் செயல்பட்டு வருகிறது. தாம்பரம், பெருங்குளத்தூர் ஆகிய இடங்களிலும் பேருந்து முனையங்கள் செயல்பட்டு வருகின்றன. இருந்தும் கோயம்பேடு பேருந்து நிலையம் போல பிரமாண்ட பேருந்து நிலையம் சென்னையில் இல்லாமல் இருந்து வந்தது.

இதனை ஈடுசெய்ய, சென்னை பேருந்து போக்குவரத்து சிரமத்தை குறைக்கும் நோக்கில் ஜிஎஸ்டி சாலையில் கிளம்பாக்கத்தில் 86 ஏக்கரில் புதிய பேருந்து நிலையத்தை தமிழக அரசு கட்டமைத்துள்ளது. கலைஞர் நூற்றாண்டு பேருந்து நிலையம் என பெயரிட்ட இந்த பேருந்து நிலையத்தின் பெரும்பாலான பணிகள் முடிந்து சில மாதங்களுக்கு முன்னதாக திறக்கப்படும் என எதிர்பார்க்கப்பட்ட நிலையில் கனமழை காரணமாக பணி தாமதமானது.

தமிழகத்தின் 13 மாவட்டங்களில் மிதமான மழைக்கு வாய்ப்பு!

இந்த கிளம்பாக்கம் பேருந்து நிலையம் எப்போது திறக்கப்படும் என அமைச்சர் சேகர்பாபு இன்று செய்தியாளர்களிடம் தெரிவித்தார். இன்று கிளம்பாக்கம் லைஞர் நூற்றாண்டு பேருந்து நிலைய கட்டுமான பணிகளை ஆய்வு செய்த அமைச்சர் சேகர் பாபு செய்தியாளர்களிடம் பேசுகையில், வரும் ஜனவரி 15, தை 1ஆம் தேதி தமிழ் புத்தாண்டை முன்னிட்டு கிளம்பாக்கம் பேருந்து நிலையம் தமிழக முதல்வர் மு.க.ஸ்டாலின் அவர்களால் திறந்துவைக்கப்பட்டு, மக்கள் பயன்பாட்டிற்கு அர்பணிக்கப்படும் என தெரிவித்தார்.

பணிகள் குறித்த முன்னேற்றத்தை அவ்வப்போது முதல்வர் அதிகாரிகளிடமும், அமைச்சர்களிடமும் தொடர்ந்து கேட்டறிந்தார். மாவட்ட அமைச்சர் தா.மோ.அன்பரசன், எம்எல்ஏ வரலட்சுமி மதுசூதனன் . துரைச்செயலாளர் சமயமூர்த்தி, மாவட்ட ஆட்சியாளர் ராகுல் ஆகியோர் இந்த பேருந்து நிலைய பணிகள் விரைவாக முடிய எல்லா வகையிலும் உதவியாக இருந்தனர்.

மொத்தம் 86 ஏக்கர் பரப்பளவில் தேவையான அனைத்து வசதிகளும் கொண்ட கலைஞர் நூற்றாண்டு பேருந்து நிலையம் முழுமை பெற்றுளளது. கடந்த 2,3 மாதங்கள் முன்னரே பேருந்து நிலையம் திறக்கப்பட வேண்டியது. ஆனால் கனமழை பெய்த காரணமாக மழைநீர் தேங்கும் சூழல் ஏற்பட்டது. இதனை தொடர்ந்து , 1200 மீட்டர் அளவில் மழைநீர் வடிகால் பணிகள் நடைபெற்று அதுவும் தற்போது நிறைவு பெற்றது. அதனால் பேருந்து நிலையம் விரைவில் திறக்கப்படும்.  3 குழுக்கள் இரண்டரை மாதத்தில் மழைநீர் வடிகால் பணிகளை நிறைவு செய்துள்ளனர்.

இந்த பேருந்து நிலையத்தில் 2,310 பேருந்துகள் நிற்கும். அதில் 840 ஆம்னி பேருந்துகளும் உள்ளடக்கம் . 1 லட்சம் மக்கள் இதனால் பயன்பெறுவார்கள். பயணிகளுக்கு உணவு வசதி , மருத்துவ வசதி, மருந்தகம்,  ஓய்வறை, உணவகங்கள், தீ தடுப்பு நிலையங்கள், குடிநீர் வசதி, கழிப்பறை வசதி , புறக்காவல் நிலையம் என அனைத்தும் அமையப்பட உள்ளது. நிரந்தர காவல் நிலையத்திற்கு முதல்வர் மு.க.ஸ்டாலினும் அனுமதி அளித்துள்ளார் என அமைச்சர் சேகர்பாபு செய்தியாளர்களிடம் தெரிவித்தார்.